03 June 2017
02:25 - АҚШнинг катта бизнес эгалари Доналд Трамп тарафида, Нью-Йорк биржасида Dow Jones янги тарихий рекорд ўрнатди, Ўзбекларга нима?
Ўтган йилги президент сайловлари кампанияси даврида Доналд Трамга қарши турган АҚШнинг асосий оммавий ахборот воситалари ва сиёсий элитаси ҳалигача мағлубиятларига кўникмасдан, унга қарши совуқ урушни давом эттирмоқдалар. Ўшандан бери АҚШнинг асосий, яъни энг катта оммавий ахборот воситалари ва сиёсий элитаси сайловларда Доналд Трамп ғалаба қозонишида Россиянинг роли борлигини исботлаш учун уриниб ётибдилар. Аммо, шу пайтгача, биронта пичоққа илинадиган факт тополмай, тирноқ остидан кир қидириш билан оворалар.

АҚШнинг дунё миқёсида энг энг кучли бўлган оммасий ахборот воситалари ва сиёсий элитаси Доналд Трампга қарши-да, АҚШда мутлақо кўпчилик билмайдиган, аммо инглиз тилида ҳам эшиттириш олиб борадиган Russia Today ва Sputnik агентликлари ҳамда Россиянинг хавфсизлик хизматининг хакерлари сайлов натижаларини Доналд Трамп фойдасига ўзгартириб юбора олишларига ишониб бўладими? У ҳолда бизнинг “Ҳаракат” Агентлигига ҳам шундай айб қўйса бўладику. Чунки, айнан биз биринчи бўлиб Доналд Трамп янги президент бўлишини башорат қилдик ва АҚШнинг энг катта оммавий ахборот воситалари эълон қилаётган сўровнома натижаларига қарамасдан, охирги кунгача Доналд Трамп ғалаба қозонишини айтиб келдик. Чунки, Доналд Трампнинг мусулмон муҳожирларни АҚШга бутунлай киритмаслик, лотинамерикалик муҳожирлар йўлига девор қуриш каби таклифлари оддий америкаларга ёқиши шубҳасиз эди.

Доналд Трамп яқинда Саудия Арабистони (“Араб-мусулмон давлатлари + АҚШ” саммитида қатнашиш), Исроил, Ватикан (Рим Папаси билан учрашув), Брюссель (НАТО саммити) ва Сициялияга (G7 cаммити) бориб келгандан кейин, унга қарши курашда яна учта фронт очилди. Биринчиси – у яқинда ишдан бўшатган Федерал Терговлар Бюросининг раҳбари, ўша ташкилотга раҳбар бўлган пайтда сайловларда Россиянинг ролини ўрганиш билан ҳам шуғулланаётган Жеймс Комей (James B. Comey) Конгресснинг қўмиталаридан бирида келаётган ҳафатада тингланиши эълон қилинди. Мақсад - Трампга қарши интригиялар қилиш. Иккинчиси – Трампнинг яҳудий аслли куёви, ҳозир Бош маслаҳатчиси Жаред Кушнер Россия билан қандайдир яширин алоқаларда бўлгани ҳақида гаплар бошланди. Учинчиси - Доналд Трамп АҚШ тарафидан 2015 йилда Парижда имзоланган Иқлим Келишувидан чиқишини эълон қилганидан кейин шу йўналишда ҳужумлар бошланди.

Аммо, энг қизиғи, АҚШнинг энг катта оммавий ахборот воситалари ва сиёсий элитаси Доналд Трампга қарши чиқаётган бўлса ҳам, катта бизнес эгалари, қўполроқ қилиб айтсак, АҚШ иқтисоди айнан Трампни қўллаб-қувватламоқда.

Масалан, шу кунларда АҚШда ишсизлар сони камайгани, ўтган ойда 150 мингга яқин киши учун янги иш ерлари очилгани эълон қилинди. АҚШда бизнеснинг аҳволини ўзида акс эттирувчи Нью-Йорк фондлар биржасининг асосий кўрсатгичи бўлган ва Доналд Трамп президентлик сайловида ғалаба қозонгандан бери зиг-загли ортиб бориб, бир неча марта тарихий рекорд ўрнатган Dow Jones индекси кеча яна тарихий рекор ўрнатди ва туш соатларида 21 минг 225 га чиқди. Биржа бекилганда Dow Jones бироз тушиб 21 минг 206 да тўхтати. Аммо, бу рақам ҳам Доналд Трамп шу йил 1 март куни Конгрессда сўзлаган биринчи нутқидан кейин ўрнатилган аввалги рекорддан каттадир.

Эслатиб ўтамиз, Dow Jones индекси АҚШнинг энг катта 30 та ширкати акцияларининг ўртача қийматини ўзида акс эттирувчи рақамдир. Демак, катта ширкатлар акцияларининг нархи кўтарилмоқда, яъни, ширкатларнинг бойлиги ортмоқда. Бу – АҚШ иқтисоди (ёки иқтисодиёти, фарқи йўқ) ўсишда эканлигининг, Доналд Трампга бизнес эгаларининг ишончи ортаётганининг исботидир.

Ҳозир эса, аввалари ҳам кўп марта айтилган фикримизни яна бир марта қайтариш фойдали эканлигини урғуламоқчимиз.

АҚШда ишлаётган ўзбеклар ҳам, бошқа мамлакатларда яшаётган ўзбеклар ҳам, фондлар биржаси/бозорида кетаётган жараёнлар билан қизиқишлари, қўл билан ушлаб бўлмайдиган, кўзга кўринмайдиган Dow Jones каби индекслар билан яшашни ўрганишлари, пулларини фақат банкларда эмас, ФОНДЛАР БОЗОРИНИНГ АКЦИЯЛАРИДА ҲАМ САҚЛАШНИ ЎРГАНИШЛАРИ ЛОЗИМ.

Ўзбекистондаги ота-оналарга ёрдам бериш шарт, аммо у ерга ортиқча пул юбориш шу пайтгача ўзбекларнинг душмани бўлган мавжуд режимга хизмат қилиш ва пулни сувга оқизишдир. Ўзбеклар чет элларда ҳам ош ейиш ва Ўзбекистонга пул юборишдан ташқари, ишлаётган мамлакатларида пул йиғиб, кичкина бўлса ҳам ўз бизнесларини очиш устида ўйласалар, фойдали бўлади.

Айнан шундай одамлардан кейинчалик катта бизнесменлар чиқади. Ана ундан кейин Ўзбекистонда ҳам бизнес очишни ўйлаш мумкин.

Айни замонда, ўзбеклар АҚШдек давлат ичида бўлаётган жараёнларнининг эртанги кунини кўрабилишда АҚШдаги ахборот воситаларидан савиялироқ эканлигини кўрсатган, Ўзбекистондаги жараёнлар ҳақида ҳам тўғри башоратлар қилаётган “Ҳаракат” Агентлигининг хабарларини ўқиб боришни ўрганишлари керак. Қолаверса, бошқа йўл ҳам йўқ. Акс ҳолда, бутун дунёни мардикорлар билан тўлатиб юраверамиз.
« Олдинги хабар Хабарлар рўйхати Кейинги хабар »