29 May 2017
19:52 - Ўзбекистон Президенти Шавкат Мирзиё АҚШга сафар қилади, хабарчиликда ёлғончилик қачон тугайди

Шу йилнинг сентябрь ойида президент Шавкат Мипрзиё АҚШга давлат ташрифини амалга оширади. Бу ҳақда унинг мутбаот хизмати хабар қилди. Хабарда ташрифнинг кун тартиби, санаси ва делегация таркиби борасида маълумотлар йўқ.

Маълумки, Шавкат Мирзиё ҳамда АҚШ президенти Доналд Трамп 21 май куни Ар-Риёдда “Араб-мусулмон мамлакатлари + АҚШ” саммити доирасида учрашганлар. Айнан шу учрашув вақтида бўлажак ташриф бўйича келишилганлиги айтилмоқда.

Хабарда айтилишича, Доналд Трамп Ўзбекистон президенти билан бўлган суҳбат чоғида 2017-2021 йилларда Ўзбекистон Республикасини ривожлантиришнинг бешта устувор йўналиши бўйича қабул қилинган Ҳаракатлар Стратегияси ҳақида ҳам ўз фикрларини айтиб, мазкур дастур ўзининг аҳамиятли натижаларини беришига ишонч билдирган эмиш. Бунга ишонадиган биронта одам топилмаса керак.

Чунки, ўша куни Дональд Трамп эрталабдан эмас, тушдан кейин сони 30 дан ошган давлат раҳбарлари билан саммит ўтказди, кейин саммит қатнашчилари билан умумий ва яккама-якка расмга тушди. Ўзбекистон нималигини ҳам билмайдиган Доналд Трамп қоғоздагина бор бўлган ва қоғозда қолиб кетиши ҳаммага маълум бўлган Ўзбекистондаги Ҳаракатлар Стратегияси билан қизиқармиди? Қизиқса ҳам, таржимон ёрдамида 30-35 киши билан гаплашишга вақти ҳам бўлмасди.

Ўзбекистонда президент ўзгарди, аммо хабарчиликда ёлғончлик, минг афсуски, давом этмоқда. Қолаверса, давлат агентлиги бўлган ЎзА шанба-якшанба кунлари дам олишни йўқ қилмаса, Ўзбекистонда хабарчилик тўғрисида гапиришнинг ўзи масхарабозликдир.