24 May 2017
03:23 - Ишониш қийин, аммо шундай: Ўзбекистон Президенти Россия ички ишлар вазирини қабул қилибди
Ўзбекистон Республикаси Президенти Шавкат Мирзиёев 23 май куни мамлакатимизга амалий ташриф билан келган Россия Федерацияси ички ишлар вазири Владимир Колокольцевни қабул қилди, дейилади ЎзАнинг қисқа хабарида.

Шавкат Мирзиё меҳмонни қутлар экан, икки мамлакат ҳуқуқни муҳофаза қилиш идораларининг терроризм ва экстремизм, уюшган жиноятчилик, наркотрафик ва қурол-яроғлар ноқонуний айланишига қарши курашиш соҳасидаги ўзаро фаол ҳамкорлигини давом эттириш ғоят муҳим эканини таъкидлаб, миграция соҳасига оид келишув ва битимларни амалга ошириш масалаларига алоҳида эътибор қаратибди.

Кўринишидан, Россия ҳам, Ўзбекистон ҳам, “Бирлик” Партияси раиси Абдураҳим Пўлатнинг АҚШ Президентига ёзган хатида исломий терроризмнинг маркази яқинда Марказий Осиёга кўчиши ҳақидаги башоратларидан катта ташвишдалар, дейди мухбиримиз. Чунки, Ўзбекистонга Россия Ички ишлар вазирининг келиши ва вазирни Ўзбекистон Президенти қабул қилиши дунёда ўхшаши йўқ воқеа бўлса керак.

Дарвоқе, хабарда меҳмон мезбонга самимий қабул учун миннатдорлик билдириб, ўз президентининг эзгу тилакларини етказгани айтилган ва ҳаромий Ислом Карим яратган анъанага кўра, меҳмон билан мезбоннинг умумий расми берилмаган.

Расмда ўнгдаги киши Владимир Колокольцев, чапдагиси Россиянинг Ўзбекистондаги элчиси бўлса керак. Аслида, бу жиддий учрашув бўлса, шу ерда Ўзбекистоннинг ички ишлар вазири ҳам бўлиши керак эди.
« Олдинги хабар Хабарлар рўйхати Кейинги хабар »