18 May 2017
19:29 - Вой-дод, сенсация: Президент Шавкат Мирзиё Эр-Риёдда Доналд Тармп билан учрашади, Каъбага ҳам олиб кириладими?
Ўзбекистон Президенти Шавкат Мирзиё Саудия Арабистони Подшоҳи Салмон бин Абдулазиз Ол Сауднинг таклифига биноан 2017 йил 21 май куни Ар-Риёд шаҳрида ўтадиган Араб-мусулмон мамлакатлари ва АҚШ саммитида иштирок этади. Бу ҳақда Ўзбекистон Ташқи Ишлар Вазирлиги хабар қилди. Саудия Арабистонига ташрифи доирасида икки томонлама учрашувлар ўтказилиши режалаштирилган.

Шавкат Мирзиё анжуманда иштирок этиш учун бу шаҳарга келадиган АҚШ президенти Дональд Трамп билан ҳам учрашар экан. Тушунилишича, учрашув ўта қисқа бўлади ва протокол тартибисиз ўтади. Шу боисдан АҚШ-Ўзбекистон президентлари учрашувининг кун тартиби ҳақида гапиришнинг ҳам кераги йўқ. Яъни, номигагина учрашув.

АҚШ Президенти Доналд Трамп президент сифатидаги биринчи чет эл ташрифларини Саудия Арабистони, Исроил ва Ватикандан бошламоқчи эканлигини, Саудияда мусулмон дунёсининг бир қатор лидерлари келадиган ва Трамп ҳам қатнашадиган йиғилиш бўлишини Оқ Уйнинг баёнотига асосланиб 5 майда “Ҳаракат” ҳам хабар қилган эди. Демак, ўша йиғилишга Шавкат Мирзиё ҳам таклиф қилинган бўлиб чиқмоқда. Маълумки, сал кам ҳамма мусулмон мамлакатларини бирлаштирувчи Ислом Ҳамкорлик Ташкилотининг 57 аъзоси бор. Уларнинг қанчаси Эр-Риёддаги саммитга келишлари ҳақида ҳеч қандай маълумот йўқ.

Шуни ҳам эслатиш керакки, Ислом Карим 1991 йилнинг охирида Саудия Арабистонига борганида, ҳақиқий мусулмон давлатининг раҳбари келди деб шошиб қолган ўша пайтдаги Саудия қироли Ислом Каримни Каъбанинг ичигача олиб кирган эди. Қизиқ, ҳозирги қирол ҳам Шавкат Мирзиёни Маккага олиб келиб, Каъбага киратадими? Нима ҳам дердик, бечора Каъба деймиз.
« Олдинги хабар Хабарлар рўйхати Кейинги хабар »