15 May 2017
19:01 - Қизиқ: Россия Ўзбекистон ҳукуматининг ёрдамида ўзбекларни ишга чақирмоқда. "Ҳаракат": Буни аллақачон қилиш керакмасмиди?
Ўзбекистон Меҳнат Вазирлиги ҳузуридаги Миграция Агентлиги ўзининг Фейсбукдаги саҳифасида Россиянинг Астрахань шаҳрида жойлашган "Хаска" корхонасига тикувчилар ишга қабул қилиниши ҳақида эълон берди. Тикувчилар устки кийимларни тикиш билан шуғулланишлари ва шу боис, ишга таклиф қилинаётганлардан тегишли квалификация талаб этилиши қайд этилган.

"Иш икки сменада амалга оширилади, 1-смена 7.00дан 19.00 га қадар (икки кун иш икки кун дам) ва 2-смена 8.00дан 16.30 га қадар (шанба ва якшанба - дам олиш кунлари)", дейилган хабарда. Иш берувчидан қўйилаётган талаб: тикувчилик касбига эга фуқаролардан рус тилида ўқиш, маълум миқдорда гаплаша олиш ва ёза олиш кўникмалари талаб этилади. Смена учун бир кунга берилган топшириқ бажарилганда, 20 минг рублдан 40 минг рублгача маош тўланиши, шунингдек, қўшимча рағбат пуллари ҳам берилиши мумкинлиги қайд этилган.

Бу дегани оддий тикувчи Ўзбекистондаги Олий Мажлис депутати ёки Университет ректоридан кўпроқ маош олишини англатади. Россия ҳудудида меҳнат фаолиятини амалга ошириш ҳуқуқини берувчи ҳужжат (патент)ни расмийлаштиришга кетадиган маблағ (8600 рубл) иш берувчи ҳисобидан қопланади.

Бир кунлик ётоқ жой ва озиқ-овқат мигрант учун 33 рублга тушиши қўшимча қилинган. Ўзбекистондан Астрахан шаҳригача йўл кира ҳақи иш берувчи томонидан ҳам қопланиши мумкин. Бундай ҳолда иш берувчи йўл кира учун тўлаган пулни 6 ой давомида иш ҳақидан ушлаб қолиши айтилган.

Миграция Агентлиги бундай иш чақириғи эълон қилиниши мақтовга сазовордир. “Бирлик” Партиси ва унинг жарчиси “Ҳаракат” Ўзбекистон ҳукумати Россияда ишлашга кетганларга ёрдам бериш билан шуғулланиши кераклигини 20 йилдан бери гапириб келмоқда эди. Ниҳоят шундай бўлаётгани яхшидир.
« Олдинги хабар Хабарлар рўйхати Кейинги хабар »