АҚШ вице-президенти Майк Пенснинг таклифи билан кеча Вашингтонга келган Россия Ташқи Ишлар Вазири Сергей Лавров Майк Пенс ва АҚШ Давлат Котиби Рекс Тиллерсон билан учрашгандан кейин, кутилмаганда Президент Доналд Трамп тарафидан ҳам қабул қилинди.

АҚШ ва Россия ахборот воситаларида Доналд Трамп Сергей Лавров билан нималарни гаплашгани ҳақида биронта жиддий гап йўқ. Аммо, улар Россияга қарши санкцияларни тилга олмаганлари, аммо, Суриядаги вазиятни муҳокама қилганлари умумий шаклда айтилмоқда.

АҚШ оммавий ахборот воситалари айнан бугун Доналд Трампнинг қарори билан АҚШ Федерал Терговлар Бюроси раҳбари Жемс Комий лавозимидан озод қилингани, Жемс Комий Россиянинг 2016 йилдаги АҚШда бўлиб ўтган президентилик сайловларига қандай таъсир кўрсатган бўлиши мумкинлиги ҳақида русларга ва Доналд Трампнинг ўзига ёқмайдиган руҳда текширишлар олиб бораётганини урғулаб, унинг ишдан олинишини Сергей Лавровнинг Вашингтонга келиши билан боғлашга ҳаракат қилмоқдалар. Бу мавзуда биронта пичоққа илинадигшан факт йўқлигини ҳисобга олсак, аввал ҳам айтганимиздек, АҚШдек давлтнинг оммавий ахборот воситалари сариқлашиб бораётганлари яна бир марта очиқча кўриниб қолди.

Тахмин қилиш мумкинки, Трамп ва Лавров ростдан ҳам биронта актуал мавзуни тилга олмасдан учрашув ўтказганлар. Трампнинг мақсади – президентилик курсисига ўтиргандан кейин дунёнинг кўп мамлакатлари раҳбарлари билан учрашишга улгурган бўлса ҳам, АҚШдаги умумий кайфиятга бўйсуниб, Путинни назардан четда қолдиргани учун, маълум маънода Путиндан кечирим сўраш бўлган. Бечора Путин бугун хурсандлигидан ухлай олмаган бўлса ажаб эмас.