20 April 2017
08:31 - Reuters Агентлигидан масхарабозча ёки сенсацион хабар: Путиннинг тадқиқот маркази АҚШдаги президент сайловларига таъсир кўрсатиш режаси тайёрлаган экан
АҚШнинг бу машҳур ахборот воситаси кеча эълон қилган “Путин билан алоқаси бор бўлган аналитик марказ АҚШда 2016 йили ўтказилган президент сайловларига таъсир кўрсатиш режаси тайёрлаган” сарлавҳали хабарнинг ўта қисқача мазмуни қуйидагича.

Бош қароргоҳи Москвада жойлашган Россия Стратегик Тадқиқотлар Институти ўтган йили АҚШда ўтказилган президент сайловларга таъсир кўрсатиш бўйича иккита ҳужжат тайёрлабди. Июнда тайёрланган ва Россиянинг юқори доираларига тарқатилган биринчи ҳужжатда Россияга юмшоқроқ муносабатда бўладиган номзоднинг АҚШ президентлигига сайланишини таъминлаш учун оммавий ахборот воситаларида ўша номзоднинг фойдасига пропаганда олиб бориш тавсия қилинибди.

Октябрь ойида тарқатилан иккинчи ҳужжатда Ҳиллари Клинтоннинг президент бўлиш эҳтимоллиги катта эканлиги урғуланиб, Трампнинг фойдасига пропаганда қилишни тўхтатиш ва АҚШнинг мавжуд сайлов системасига бўлган ишончнинг обрўсини тушириш ва шу йўл билан Ҳиллари Клинтонга бўлган ишончни ҳам камайтириш тавсия этилибди. Русларнинг инглизчада ҳам ишлайдиган Russia Today ва Sputnik номли хабар агентликлари ўша иккита ҳужжат кўрсатмалари бўйича иш олиб бориб, Доналд Трамп президент бўлишига эришишгани очиқча айтилмаса ҳам, шу йўналишда имо-ишоралар қилинган.

Сайловлардан кейин иккала ҳужжатни ҳам АҚШ разведкаси қўлга киритганини АҚШдаги ҳокимият вакиллари Reuters Агентлигига еткзишибди. Табиий, уларнинг исми айтилмаслиги алоҳида урғуланган.

Хабарда Россия Стратегик Тадқиқотлар Институтининг расмий веб-сайти адреси (riss.ru) ҳам кўрсатилган. Сайтнинг инглизча саҳифаси ҳам бор экан.

Бу сайтга кириб кўрдикки, дейди мухбиримиз, унга шу йилнинг бошида янги раҳбар тайинланибди. Бу - 2003-2007 йиллари Россиянинг Бош вазири, сўнги йилларда Ташқи Разведка Хизматнинг бошлиғи бўлган Михаил Фрадков. Унгача бу институтга Ташқи Разведка Хизматидан чиққан генерал-лейтенент Леонид Решетников директорлик қилган экан.

Reuters Агентлиги иддао қилаётган фактлар тўғри бўлса, яъни Россия Стратегик Тадқиқотлар Институти ўзининг иккинчи ҳужжатида тўғри йўл кўрсатиб, Доналд Трамп Президент бўлишига эришган бўлса, нега Леонид Решетниковни ишдан олишди? Айнан Доналд Трамп Президент бўлишини 2016 йилнинг февраль ойидан бери башорат қилиб келаётган “Бирлик” Партияси раиси Абдураҳим Пўлат ва “Ҳаракат” Агентлигига қандай баҳо бериш керак? Балки, бизга Россия Стратегик Тадқиқотлар Институтидан ваҳий келгандир?

Хуллас, бу хабардан сенсация эмас, масхарабозлик ҳиди кўпроқ келмоқда. Тахмин қилиш мумкинки, АҚШнинг ҳамма таниқли ахборот воситалари билан биргаликда Ҳиллари Клинтон тарафдори бўлган ва ҳозир алам ичида юрган Reuters Агентлиги ўзи ҳақ эканлиги, ишни эса Россия бузиб, Доналд Трампни президент қилиб қўйганини кўрсатиш учун ҳар қандай масхарабозликка ҳам тайёр.

Дарвоқе, бу хабарга Владимир Путиннинг расми қўйилган ва бу расм унинг Ўзбекистон Президенти Шавкат Мирзиё билан учрашуви пайтида олингани айтилган. Эй, худо, АҚШнинг оммавий ахборот воситалари бизни аввал Бош вазир, кейин Президент Шавкат Мирзиёнинг топшириғи билан Россия Ташқи Разведка Хизматига ишлашда айблашларига йўл қўйма, бизни шарманда қилма!
« Олдинги хабар Хабарлар рўйхати Кейинги хабар »