Туркия матботидаги хабарларда айтилишича, Евросиё Жамоатчилик Фикрини Ўрганиш Маркази (Avrasya Kamuoyu Araştırmaları Merkezi) ўтказган сўровномларга кўра, 16 апрелдаги референдумда Конституцияга ўзгартиришлар киритилишига “Йўқ” дейдиганлар 57,5 фоиз, “Ҳа” дейдиганлар 42,25 фоиз экан.

Бу Марказнинг раиси Кемал Ўзкираз (Kemal Özkiraz) ўзлари ўтказган сўровномаларнинг тўғрилик даражаси бир неча фоиз бўлиши мумкинлигини ҳам айтиб, 16 апрелда “Йўқ” дейдиганларнинг фоизи 53-57 орасида бўлишига амин эканлигини урғулаган ва агар ўз Маркази тарафидан айтилаётган рақамлар хато бўлиб чиқса, бу Марказни ёпиб ташлашини эълон қилган.
Кемал Ўзкиразнинг мардлигига беш кетиш билан бир қаторда, дейди мухбиримиз, бўлиши мумкин бўлган воқеаларни ҳар тарафлама анализ қилиш муҳимдир. Гап шундаки, агар референдумда “Ҳа”чилар ғалаба қозонса, жорийдаги Президент Ражаб Эрдўғоннинг ҳокимияти Евросиё Жамоатчилик Фикрини Ўрганиш Марказини атайлаб ёлғон маълумотлар тарқатганликда айблаб, уни шундоғам бекитиб ташлайди. Кемал Ўзкираз ва одамлари, тезда Туркиядан қичиб қолишмаса, қамоққа ташланишлари ҳам мумкин.

Туркияда давлатни исломлаштириш давом этаверса, сон-саноқсз дунёвийлик тарафдорлари Оллоҳнинг душмани сифатида қамоқларда чиритилади, ёки олий жазо тикланиб, уларнинг бир қисми дорга осилади.

Жараёнлар айнан шу йўналишда давом этишини тушуниш учун СССРда Сталин замонида бўлган воқеаларни билиш керак. Мана биттагина мисол. “Бирлик” Партияси лидери Абдураҳим Пўлат сайтимизда ҳам эълон қилинган хотираларидан бирида айтишича, ўтган асрнинг 30-чи йиллари ўртасида унинг Файзи амакиси Тошкент-Чимкент йўлидаги Ғишткўрик қишлоғида чойханачи бўлган. У пайтда коммунистлар чойхоналарни “қизил чойхона” деб атаб, у ерга Лениннинг гипсдан қилинган бюстларини қўйишган ва чойхоналардан пропаганда маркази сифатида фойдаланишган. 1936 ёки 1937 йили чойханага янги бино қурилибди. Лениннинг бюстини замбилғалтакда янги бинога ташиётган Файзи амаки бюстнинг бурнини синдириб қўйибди. Улуғ доҳийнинг бюстини атайлаб синдиришда, халқ душмани эканликда айбланган Файзи амаки 10 йилга кесилиб Сибирга жўнатилган ва бошқа миллионлаб шу каби “халқ душманига” чиқарилганлар билан ўша ерда йўқ бўлиб кетган.

Тўғри, ҳозир замон бошқа, Сталин ва Гитлер каби ғоявий диктаторлар қилган оммавий қирғинликларни қайтариб бўлмайди, аммо қилиб бўлмайдиган ишларни қилоламан дейдиган кишилар ҳали ҳам дунёда бор. Ислом фанатиклари айнан шундайлардандир.