07 April 2017
15:10 - Оддий хабар: АҚШ Россияга тиш кўрсатиб, Суриянинг Шайрат аэробазасини йўқ қилди

Кеча маҳаллий вақт билан кечқурун АҚШнинг Ўрта Ер Денгизидаги ҳарбий кемаларидан Суриянинг  Хомс вилоятида жойлашган Шайрат аэробазасига 59 та машхур "Томагавк" қанотли ракетаси отилди ва аэробаза феълан йўқ қилинди. Лекин, бу ҳужам натижасида 5 суриялик ҳарбий ва қўшни қишлоқларда 4 киши ҳалок бўлгани айтилмоқда. Ваҳолангки, “бизнинг” террорист Акбаржон Жалилов Санк-Петербургда бир ўзи 14 кишини ўлдирган эди.

Сурия ва Россия расмийлари АҚШ кемаларидан отилган 59 та ракетанинг ярмисидан камигина Шайрат аэробазасига етиб боганини иддао қилмоқдалар. У аҳмоқларга ишонса, америкаликларнинг 30 тача ракетаси Ойга учиб кетган бўлса керак. Баъзи хабарларда америкаликлар бир эмас, иккита аэробазани урганлари ҳам айтилмоқда.

Нима бўлса ҳам, бу воқеа жаҳон ахборот воситаларини оёққа турғазди. Аммо, “Ҳаракат”ни эмас. Чунки, АҚШ Россияга кечикиб тиш кўрсатишининг катта аҳамияти бўлмайди. Қолаверса, “Ҳаракат” йиллардан бери Россия Эрон билан ҳамкорликда Яқин Шарқдаги мавқесини тиклаш учун ҳаракат қилаётгани, аммо, Ғарб, биринчи навбатда, АҚШ бунга ортиқча эътибор бермаётганини айтиб келмоқда. Тўғри, бу – тиши ҳам йўқ Барак Обаманинг хатоси эди, аммо, руслар айтадиган “поезд ушел” ифодаси ҳозир жуда ҳам ўринлидир.

Кечаси соат 3 атрфида журналистлар олдига чиққан Доналд Трамп бу ҳужум Сурия армиясининг 4 апрелда Идлиб шаҳрига газ бомбалари ишлатиб қилган ҳужуми натижасида ичида ёш болалар ва чақалоқлар ҳам бўлган 100 га яқин бегунох кишининг ўлдирилишига жавоб эканлигини, ўша ҳужум айнан Шайрат аэробазасидан уюштирилганини урғулади. Аммо, ўзининг Сурия бўйича стратегияси бундан буён қандай бўлишига имо-ишора ҳам қилмади. Ғарб давлатлари, Туркия ҳам уларнинг ичида, бу ҳужумни маъқулладилар. Эслатиш керакки, 2 йилча аввал турклар айнан Шайрат аэробазасига яқин жойларда ўрисларнинг ҳарбий учоғини уриб тушириб, Россия-Туркия мунсабатларини портлаш нуқтасига келтирган эдилар.

Табиий, Россия ҳозир АҚШдан ғазабда. Путин америкаликларнинг ҳужумини мустақил давлатга нисбатан агрессия деганини унинг матбуот котиби эрталаб эълон қилганди. Путиннинг ўзи ҳозиргина бу масала бўйича Россия Хавфсизлик Комитетининг мажлисини ўтказди. Аммо, у ерда қандай қарор қабул қилингани айтилмаяпти. Тахмин қилиш қийин эмаски, Россия АҚШнинг бу тиш кўрсатишини тинчгина ютиб юбормоқчи, чунки, АҚШ бошқа ҳеч нарса қилмаслигига ишонади.

Путиннинг ишончини тўғри тушуниш керак. Ҳозир Сурияда АҚШнинг манфаатлари учун курашадиган ҳарбий куч йўқ, деса бўлади. Аввал, америкаликлар курдлардан фойдаланмоқчи бўлдилар, аммо бу масалада Эрон, Ироқ ва Туркия билан қарама-қаршиликка боришни истамадилар. АҚШ у ерга ўз армиясини киритиш ниятида эмас, чунки, шундай қилса, қурбонлар беришга тўғри келади. Буни оддий америкаликлар қабул қилмайдилар.

Хуллас, бу воқеа бир неча кун дунёнинг диққат марказида туриб, кейин секин-аста унутилса керак. Аммо, Яқин Шарқда яқин орада тинчлик бўлмайди.