27 March 2017
18:02 - Москвадаги рухсатсиз намойиш учун Алексей Навальнийга иккита жазо – жарима ва 15 кунлик қамоқ
Кеча Москва марказида коррупцияга қарши норозилик намойиши ўтказишга ҳаракат қилган 10 мингча одамдан 500 дан кўпроғи қўлга олингани, уларнинг ичида Коррупцияга Қарши Кураш Фондининг асосчиси ва раиси, кеча Москвада ва Россиянинг жуда кўп шаҳарларида ўтказилган ёки ўтказишга ҳаракат қилинган намойишларнинг бош ташаббусчиси Алексей Навальний ҳам борлигини аввал хабар қилган эдик.

Ҳозир маълум бўлишича, Москванинг Тверь тумани суди бугун Алексей Навальнийга рухсатсиз намойиш ўтказишга ҳаракат қилгани учун 20 минг рубль жарима солган, қўлга олиниш пайтида полицияга қаршилик кўрсатгани учун уни 15 кунга қамаш ҳукми ҳам чиқарган.

Маълумки, Алексей Навальный 2014 йил 30 декабрда “Ив Роше Восток” ширкати атрофидаги қандайдир қалбакиликлар бўйича 3,5 йилга шартли озодликдан маҳрум этилганди. Мустақил таҳлилчилар бу ҳукм Путин режимининг талаби билан асоссиз чиқарилганини айтишмоқда. Нима бўлганда, у ҳукм кучга кирган. Шартли ҳукм остидаги одамнинг 15 кунга қамалиши ўша шартли ҳукмга ҳам таъсир қиладими деган саволга бизда жавоб йўқ, дейди мухбиримиз.

Расм Тверь судида олинган.
« Олдинги хабар Хабарлар рўйхати Кейинги хабар »