26 March 2017
21:04 - Алексей Навальний Россияда президентлик пойгасини бошлади, унинг тарафдорлари Москва ва бошқа шаҳарларда норозилик акциялари уюштирдилар
Коррупцияга қарши кураши билан халққа танилган, 2013 йилдаги Москва ҳокими сайловларида тахминан 25 фоиз овоз ҳам ололган Алексей Навальний 2018 йили бўладиган президентлик сайловларида иштирок этиш йўлида биринчи қадамни қилиб, бугун Москва, Санкт-Петербург ва Россиянинг на бир қатор шаҳарларида рухсат берилмаган намойишлар ўтказди. Табиий, оммавий ахборот воситаларининг диққати Москвага қаратилган эди

Москвада Белорусь вокзали олдида тўпланган намойишчилар, уларнинг ичида Навальнийнинг ўзи ҳам бор эди, Тверь кўчаси бўйлаб Пушкин Майдонига юриш қилмоқчи бўлдилар, аммо полиция бунга йўл бермади. Шаҳар полициясининг расмий сайтида 7-8 минг намойишчи йиғилгани айтилишидан тушуниш мумкинки, аслида, йиғилганларнинг сони бундан ҳам кўп бўлган.

Намойишчилардан тахминан 500 киши, Навальний ҳам уларнинг ичида, полиция тарафидан ушлаб кетилди. Йиғилганлар бир неча соатдан кейин тарқалдилар. Қўлга олинганлар маъмурий жазолар билан қутилишса керак

Навальний тарафидан тузилган Коррупцияга қарши Кураш Фондининг Москвадаги офисига ҳам полиция келгани хабарларда айтилмоқда.

Алексей Навальнийнинг Коррупцияга қарши Кураш Фонди жуда кўп давлат одамларининг коррупцияга аралашганлари ҳақида материаллар эълон қилди. Яқинда Бош Вазир Дмитрий Медведев ҳақида ҳам шундай материаллар эълон қилинди.

Навальний президент бўлса ҳам коррупцияга қарши кураш асосий мақсадларидан бири бўлиб қолишини қайта-қайта айтмоқда. Кўринишидан, у коррупционерлар фош қилиниб, улар ишдан ҳайдалса ва қамалса, мамлакатда коррупция битади, деб ўйлайди.

Аммо, айтиш керакки, коррупцияни бундай йўл билан йўқ қилиб бўлмайди, дейди мухбиримиз. Очиғини айтса, коррупцияни бутунлай йўқ қилиб бўлмайди. Автомобиллар бор экан, автоҳалокатларни бутунлай йўқ қилиб бўлмаслиги каби, одамлар бор экан, коррупцияни бутунлай йўқ қилиб бўлмайди. Автоҳалокатлар ва коррупцияни минималлаштириш устида ишлаш керак. Коррупция ва порахўрликни минималлаштиришнинг ягона йўли – демократиядир.

Шундай экан, Навальний Россиядаги демократик мухолифат билан бирга бўлиши ва демократик мухолифатнинг ҳокимиятга келиши учун курашиши керак эди. Аммо, Россиянинг демократик мухолифати кучсиз, унинг ичида ҳам бирлик-баробарлик йўқ. Алексей Навальний демократик мухолифатга қўшилди, аммо келишмовчиликлардан кейин бин неча марта чиқиб кеди, кейин қайтиб келди ва ҳоказолар. Унинг ҳозир рўйхатдан ўтмаган Прогресс Партияси номли ўз партияси ҳам бор.

Навльний ва бошқа демократ мухолифатчилар турли келишмовчиликлардан юқори туриб бирлашмасалар, Россияда демократия бўлмайди, демак, коррупция ва порахўрлик гуркирайверади.

Бундай воқеалар ўзбекларга ҳам дарс бўлиши керак.
« Олдинги хабар Хабарлар рўйхати Кейинги хабар »