22 March 2017
20:01 - Олмаота-Тошкент йўналиши бўйича тезюрар поезд юришга бошлади
Бугун “Олмаота-2” темир йўл вокзалидан Олмаота-Тошкент тезюрар поездининг илк рейси йўлга чиқди. Поезд Қозоғистонда ишлаб чиқарилган 29 та "Тулпор-Тальго" вагонларидан иборат.

Поездда тўрт синфдаги вагонлар бор. "Люкс" вагонлар душ хоналари, санитария узели ва телевизорлар билан жиҳозланган. Ҳар биридаги ўриндиқлар икки кишига мўлжалланган. Бундан ташқари, вагонлар имконияти чекланган йўловчилар талабига максимал даражада мослаштирилган.

“Казахстан темир жолы” (КТЖ) АЖ вице-президенти Эрик Имашевга кўра, икки ўринли бизнес-синфидаги купе юз-қўлларни ювгичлар ва икки қўшни купени биттага бирлаштириш имконига эга. Бу фарзандлари билан йўлга чиққанлар учун қўл келади. Тўрт ўринли купе вагонларининг майдони ҳам, ўрин жойлари ҳажми ҳам катталашган. Иқтисод-синфидаги икки вагоннинг ҳар бирида 36та ўрин бор – ихчам ўриндиқлар ва кенглик анча ҳамёнбоп нархда қулай шарт-шароитларда сафар қилиш имконини беради. Бундан ташқари, поездда алоҳида вагон, вагон-ресторан ва вагон-бар ҳам бор.

Янги йўналиш Ўзбекистон Президенти Шавкат Мирзиё ва Қозоғистон Президенти Нурсултой Назарбойнинг келишуви асосида ташкил этилди. Поезд Олмаотадан душанба ва шанба кунлари, Тошкентдан сешанба ва якшанба кунлари йўлга чиқади. Манзилга 16 ярим соатда етиб боради. Поезд йўл давомида Отар, Чу, Тараз, Чимкент, Сариоғоч станцияларида тўхтаб ўтади.

“Казахстан темир жолы” тарқатган хабарда вагонлардан бирининг ичида олинган расмгина бор.
« Олдинги хабар Хабарлар рўйхати Кейинги хабар »