АҚШнинг янги президенти Доналд Трамп Конгрессда биринчи марта нутқ сўзлаши ҳақида матбуотда бир неча кундан бери гапирилмоқда эди, дейди ҳозир мажбуран шу мамлакатда яашаётган “Бирлик” Партияси лидери Абдураҳим Пўлат. Бундай нутқ аслида халққа мурожаат бўлишини ҳам тушунардим. Мен Доналд Трампни президентлик сайлов кампанияси бошланган кунларданоқ қўллаб-қувватлаганим, унинг президент бўлиб сайланиши аниқ эканлигини ўша пайтданоқ башорат қилиб келганим сабабли, Конгрессдаги чиқишини бориб кўришни ҳам ўйлаб қўйдим. Аммо, унга ҳали анча кун бор деб ўйлабман ва масала билан яқиндан шуғулланмабман.

Бунинг жиддий сабаби бор. Маълумки, шу 28 январда Тошкентда Ўзбекистоннинг тарихида қоладиган муҳим воқеа бўлди, бу – “Бирлик” Халқ Ҳаракати Партияси Марказий Кенгашининг кенгайтирилган мажлиси ўтказилишидир. Тўғри, бу йиғилиш тарихий воқеа эканлигини ўзбек миллати тушуниб етиши учун анча вақт керак. Ўша йиғилишда янги президент Шавкат Мирзиё Ўзбекистонда жиддий ўзгаришлар қилиши ҳақида ваъдалари қанчалик ишончга лойиқ эканлигини кўриш учун бироз кутишга, партияни расмий рўйхатдан ўтказиш масаласи бўйича Адлия вазирлиги билан иш бошлашга, Ислом динида фундаментал ислоҳотлар ўтказиш ва динимиз дунёвийлик/секуляризм принципини қабул қилиши масаласи билан шуғулланишга келишилди.

Аммо, ўша йиғилишдаги қарорларни амалга ошириш йўналишад иш бошлаш учун ҳеч қўлим бормади. Ҳаёлимда бир масала ўтириб қолди – Ислом дини ўз ичида фундаментал ислоҳотлар ўтказиб, биринчи навбатда, дунёвийлик принципини расман тан олмагунча, бутун Ислом дунёсида, демак, Ўзбекистонда ҳам , демократияни ривожлантириб бўлмаслигини, демократиясиз ҳеч ким қолоқликдан чиқолмаслигини, Ислом дунёси эса ташқаридан ёрдамсиз ислоҳотларга қодир эмаслигини тушунганим учун, бу ҳақда АҚШнинг янги президенти Доналд Трампга хат ёзиш-ёзмаслик масаласи.

Ниҳоят бир қарорга келдим ва 20 февралда хат ёзишни бошладим, аммо бир неча сатрдан кейин олға кетолмадим. Хатнинг умумий руҳи қандай бўлиши кераклиги ҳақида аниқ фикр йўқ эди. Ниҳоят бу ҳақда ҳам бир қарорга келдим ва охирги икки кун сал кам ухламасдан бу тарихий, ростдам ҳам тарихий, фақат ўзбеклар ёки мусулмонлар учун эмас, Ғарб учун хам тарихий бўладиган бу хатни 27-чи февралдан 28 га ўтар кечаси битириб, 28 февраль куни эрталаб “Ислом дини дунёвий/секуляр бўлмагунча, АҚШда ва бутун дунёда ислом терроризми хавфи ортиб бораверади” деб номланган хатимни махсус почта орқали Оқ Уйга жўнатдим.

Бироз роҳатланибман шекилли, сўнги йилларда биринчи марта телевизор ҳам кўрмадим, Интернатга ҳам кирмадим. Ярим кечасига яқин ухлашдан аввал телевизорни қўйсам, ҳамма асосий каналлар Доналд Трампнинг Конгрессдаги нутқини муҳокама қилмоқдалар. Қаранг, шундай воқеани кўздан қочирибман. Аммо, уларни кўриб ўтирмадим ва ухлашга кетдим.

Бугун эрталаб кўрдимки, АҚШнинг ҳамма асосий телеканаллари ҳали ҳам асосон Доналд Трампнинг Конгрессдаги нутқини муҳокама қилиш билан оворалар.

Тушундимки, Доналд Трамп, балки умрида биринчи марта, шок терапияси усулларини четга қўйиб, ўта силлиқлик билан америкаликларни буюк орзулар билан яшашга чақириб, бу орзулар амалга ошиши учун ўзи ҳар нарса қилишга тайёр эканлиги, биринчи қадам сифатида бўлса керак, мамлакатда структуравий ўзгаришглар учун 1 триллион доллар пул ажратиш устида ишлаш ниятини билдирибди, муҳожирларни, табиий гап мусулмон муҳожирлар ҳақида кетмоқда, АҚШга келиши йўлидаги тўсиқлар қўйишни орқага сурмоқчи эканлигини айтибди.

У НАТОни янада кучлироқ қилиш кераклиги ва Яқин Шарқдаги муаммоларни тилга олсада, Россияни умуман эсламагани ҳам диққатга сазовордир. Бу ерда, “бечора Путин” дейишдан бошқа йўл йўқ.

Хуллас, мен Доналд Трампнинг нутқини маъқуллайман, менинг таклифларим унинг фикрлари билан ҳамоҳанг эканлигидан мамнунман.

Дунёнинг, тўғрироғи, дунё сиёсатчиларининг бу нутққа муносабатлари билан ҳали танишганим йўқ. Аммо, Нью-Йорк фондлар биржаси ҳам мен каби позицияда эканлигини алоҳида урғуламоқчиман. Мана, бугун биржа иш бошлаганига 2 соатча бўлди. Бу вақт ичида, биржанининг асосий кўрсатгичи Dow Jones индекси 250 поғана юқорига сакраб, тарихда биринчи марта 21 мингдан ошди.

Маълумки, Dow Jones индекси АҚШдаги энг катта 30 ширкат акцияларининг ўртача қийматини ўзида акс эттирувчи рақамдир. Демак, катта ширкатлар акцияларининг нархи шундай рекорд даражага юксалди. Бу – Доналд Трампнинг Конгрессда қилган кечаги нутқига ишонч белгисидир.

Расмда – Доналд Трамп Конгресс минабарида. Унинг орқасида Конгресснинг юқори ва қуйи палаталари – Сенат ва Вакиллар Уйининг раислари Майк Пенс (у айни пайтда Вице-президентдир) ва Пол Райан.