АҚШ Президенти Доналд Трамп ва Исроил Бош вазири Бенямин Натаняху кеча Оқ Уйда учрашдилар. Яккама-якка суҳбатдан кейин улар матбуот конференцияси ҳам ўтказдилар. Ҳаммани қизиқтираётган савол аввалдан маълум эди – Исроил Филистин давлати тузилишига йўл берадими ёки йўқ? Табиий, ҳеч қандай жавоб берилгани йўқ.

Бенямин Натаняху ўзига тўғридан-тўғри берилган “икки давлат тушунчасига қандай қарайсиз?” саволига жавоб беришдан ҳам қочди ва “Мен турли этикеткаларга эмас, масаланинг моҳиятига эътибор бераман. Тинчлик бўлиши учун иккита нарса шарт. Биринчидан, филистинлар Исроил давлатини тан олишлари керак. Иккинчидан, Иордания дарёсининг ғарбий соҳилида хавфсизлик бизнинг назоратимиз остида бўлиши керак” деди.

Яъни, кўринибтурибдики, Исроил яқин орада Филистин давлати яратилишига йўл бермоқчи эмас. Маълумки, Исроил Филистин давлатиники бўлиши керак бўлган ерларда яҳудийлар учун уй-жойлар қуришни сўнги даврда янада тезлаштирганди. Доналд Трамп матбуот конференцияси пайтида Натаняхуга қараб, “Биз бу ишни бироз кечиктиришингизни истардик” деб ўта юмшоқ шаклда гапиришини эса, Исроилни рағбатлантириш деб тушуниш керак.

Доналд Трамп президент сайловлари олдидан Натаняху билан кўришганда, бутун Қуддус Исроилнинг пойтахти бўлиши кераклигини гапириб, ўзи президент бўлгач, АҚШнинг элчихонасини Тел-Авивдан Қуддусга кўчиришга ваъда берган эди. Матбуот конференциясида бу нозик масала тилга олинмади.