12 February 2017
23:22 - Шавкат Мирзиё 2017-2021 йиллaргa мўлжaллaнгaн ўз стратегиясини тасдиқлаб бўлгани ҳақида кечиккан хабаримиз
6 февралда “Шавкат Мирзиёнинг 2017-2021 йиллaргa мўлжaллaнгaн стратегияси ҳақида “Ҳаракат”нинг фикрлари” сарлавҳали хабар эълон қилиб, янги президентнинг “Ўзбекистон Республикасини янада ривожлантириш бўйича ҳаракатлар стратегияси тўғрисида” номли фармонига аввал ортиқча эътибор бермаган бўлсак ҳам, кеч бўлса-да ўз фикрларимзни очиқлашни лозим топиб, бу фармонга муносабат билдирган эдик.

Муносабатимизни бир оғиз сўз билан айтсак, бу стратегия тўғри, аммо умумий гаплардан иборат эканлигини урғулаган эдик ва шундай савол-хулосага келгандик: “Ислом Карим 2010 йил 12 ноябрда Oлий Мaжлисда эълон қилган “Мaмлaкaтимиздa дeмoкрaтик ислoҳoтлaрни янaдa чуқурлaштириш вa фуқaрoлик жaмиятини ривoжлaнтириш кoнцeпцияси” қоғозда қолиб кетгани ҳаммага маълум. Кўрамиз, Шавкат Мирзиёнинг стратегияси қоғоздан чиқадими?”

Ҳозир маълум бўлишича, Шавкат Мирзиё бу стратегиясини 7 февралда тасдиқлабди, аммо биз яна эътибор бермабмиз. Балки, унинг командаси айнан бизнинг бу стратегияга муносабатимизни кутгандир. Бўлиши мумкин, чунки, “Бирлик” Партияси лидери Абдураҳим Пўлатнинг 2016 йил 24 октябрда ўша пайтда вақтинча президент бўлган Шавкат Мирзиёга йўллаган хатида шундай сўзлар бор эди: “Ўзбекистонда инқилобий ва фундаментал ислоҳотларни “Бирлик”сиз, у ҳокимиятда бўладими, мухолифатда бўладими, фарқи кам, амалга ошириб бўлмайди. Мухолифатсиз келажагимиз йўқ!”

Ҳозир Шавкат Мирзиёнинг қилаётган ишлари кўрсатмоқдаки, унинг ваъдалари, жуда катта эҳтимоллик билан, ёзилган бўлса қоғозда, айтилган бўлса ҳавода қолиб кетади, Ўзбекистонда на сиёсий, на иқтисодий соҳада ҳеч нарса ўзгармайди. Бу кетишда ғариб аҳволдан чиқолмаймиз. Демак, ҳамма нарса яна “Бирлик”нинг елкасига тушади.