Янги йил кечаси Истанбулдаги Reina номли кўнгилочар тунги клубда 39 кишини автомат билан тараб ўлдирган, бир ҳафтадан кейин ўзбек эканлиги аниқланган Абдуқодир Машарипов 17 январда Истанбулнинг Эсенюрт номли қисмида қўлга олинганди. Ўшандан бери хавфсизлик хизматларининг Истанбулдаги бир кишилик ҳужрасида сақланаётган террорист қўқонлик эканлиги, у номи айтилмаётган университетнинг физика-математика бўлимини битиргани, турмуш ўртоғи Зарина Нуриллаева билан Покистонда яшаган пайтлариида ИШИДга қўшилганлари ва Истанублдаги теракт учун қандай ва кимлар билан тайёргарлик кўрилгани ҳақида кўплаб маълумотлар тарқатилди.

Истанбул Хавфсизлик Мудирлигининг Террор билан Кураш Бўлими тарафидан олиб борилаётган тергов ишларининг бошланғич қисми охирига етгач, кеча Абдуқодир Машариповни ҳибсга олиш талаби билан шаҳар судига олиб борганлари, суд унга ҳибсга олиш ҳукми чиқаргани ва у қамоқхонага жўнатилгани, у ерда ҳам бир кишилик ҳужрага жойлаштирилгани Туркия матбуотининг хабарларида айтилмоқда.

Хабарларда янги йил кечаси уюштирилган террор ҳужумини тайёрлаш ва ҳужумни амалга ошириш билан боғлиқ жуда кўп тафсилотли маълумотлар бор. Теракт қандай ва кимлар ёрдамида тайёрланганини ўқисангиз, Истанбул ва Туркия ИШИДчилар билан тўла экан деган фикрга ҳам келиш мумкин. Шу йил 5 февралда бутун Туркия бўйлаб ўтказилган махсус операцияларда ИШИДчи эканлиги тахмин қилинаётган 460 киши қўлга олингани ҳам хабар қилинган эди. Демак, ростдан ҳам Туркия ИШИДчилар билан тўла экан.

Кечаги хабарларда яна бир қизиқ воқеа тилга олинади. Абдуқодир Машарипов 27 декабрда ўғли учун видио-васият қолдирибди. Турмуш ўртоғи Зарина тарафидан олинган видео-васиятда у ўзи ўлимга кетаётганини айтиб, ўғлини балоғат ёшига етмагунча онасини роҳатсиз қилмасликка, аммо кейин ўзи каби ўлимга кетишга чақирибди.

Аввалги хабарларимиздан маълумки, Абдуқодир ва Заринанинг икки ўғлидан каттаси ИШИДчилар қўлида эканлиги ва Зарина ўғли Туркиядан олиб кетилганини тахмин қилаётгани айтилган эди.

Туркияда тарқатилган кечаги хабарларнинг яна бир қизиқ жойи шундаки, Абдуқодир Машариповнинг ўзбек ва қўқонлик эканлиги умуман тилга олинмаган.