08 February 2017
18:21 - Жуда қизиқ: Доналд Трамп ва Ражаб Эрдўғон кеча телефонда гаплашдилар, АҚШ разведкасининг бошлиғи эртага Туркияга келмоқда
Дунё мамлакатларининг раҳбарлари навбатга туриб, АҚШнинг янги Президенти Доналд Трамп билан телефонда гаплашаётганлари жаҳон ахборот воситаларининг асосий хабарларидан бўлмоқда. Аммо, хабарлар умумий гаплардан иборат бўлиб, Трамп билан суҳбатларга доир биронта пичоққа илинадиган янги гап йўқ.

Трампнинг сенсациядек кутилган Путин билан суҳбати ҳақида ҳам шундай дейиш мумкин. Трампнинг Эрдўғон билан кечаги суҳбати ҳақида ҳам шудай дейишдан бошқа йўл йўқ. Аслида, НАТО аъзоси бўлган Туркия раҳбари НАТОнинг бош душмани Владимир Путин билан оғиз-бурун ўпишиб ётган пайтда бўлган бу суҳбат пайтида Доналд Трамп ўзи хос шок терапияси усули билан Эрдўғронга қаттиқ гаплар ҳам гапирган бўлишининг эҳтимоллиги жуда катта.

Бугун Туркиянинг оммавий ахборот воситалари эртага Анқарага АҚШ Марказий Истиҳборат Ташкилотининг (МИТ, инглизча – CIA, русча – ЦРУ) яқинда Трамп тарафидан тайинланган янги раҳбари Майк Помпео (Mike Pompeo) келаётганини хабар қилдилар. Бу хабарларда ўта қизиқ бир воқеа ҳам тилга олинмоқда. Ўтган йили 15 июлда Туркияда давлат тўнтаришига уриниш бўлгандан кейин, ўша пайтда АҚШ конгрессмени бўлган Майк Помпео Твиттердаги саҳифасида Ражаб Эрдўғонни “исломчи тоталитар диктатор” деб атаган, аммо кейин бу ёзувни олиб ташлаган экан.

Тахмин қилиш мумкинки, Эрдўғон Трамп билан гаплашганда, ИШИДга қарши урушда Россия ва Эрон билан бирга бўлишга мажбур бўлаётгани, аслида, НАТО ва АҚШга содиқлиги ҳақида ҳикоялар айтган, Трамп ҳақиқий аҳволни ўрганиш учун МИТ раҳабари Майк Помпеони Анқарага юбориш қарори олган. Қизиқ, Майк Помпео Туркияга келганда “исломчи тоталитар диктатор” билан ҳам кўришадими?