07 December 2016
01:05 - Ангела Меркел ўз партиясининг раислигига қайта сайланди, ўз нутқида ниқоб-чачвонни тақиқлаш кераклигини гапирди, шариатга қарши чиқди

Кеча, 6 декабрь куни Германиянинг Эссен шаҳрида Канцлер Ангела Меркел раислик қиладиган “Христиан-Демократик Иттифоқи” Партиясининг навбатдаги қурултойи бўлиб ўтди. Бу ҳақда хабар берган ахборот воситалари Ангела Меркелнинг 77 дақиқалик нутқи 11 дақиқа чапаклар билан олқишланганини урғуламоқдалар. Шундан ҳам тушунса бўлардики, Ангела Меркелнинг бир неча кун аввал эълон қилинган “қайтадан раис бўлиш учун курашиш нияти” қурултой делегатлари тарафидан қўллаб-қувватланмоқда. Шундай бўлди ҳам, у қайтадан раис этиб сайланди. Демак, у яна Канцлер ҳам бўлиб қолади.

Унинг нутқида мусулмонларга ёқмайдиган бир мавзу ҳам тилга олинди. Ангела Маркел жамоат жойларида ниқоб-чачвонда юришни тақиқлаш кераклигини айтди. Биз, деди у, шахсий мулоқотлар пайтида бир-биримизга юзимизни кўрсатамиз. Бу биз учун муҳим нарсадир. Айнан шу сабабдан, юзни бутунлай бекитадиган ниқоб-чачвонларга жой йўқ, улар қонунлар билан тақиқланиши керак, бундай нарсалар мамлакатимизнинг табиати эмас. Бизга шариат қонунлари билан яшайдиган параллел жамиятлар керак эмас.

У ўз нутқида ниқоб-чачвон сўзини эмас, европаликларнинг “вуаль” сўзини ишлатди, аммо у айнан мусулмон аёллари тақадиган ниқоб-чачвонни назарда тутмоқда эди. Қолаверса, у шариатга қарши эканлигини очиқча намойиш қилди. Ислом динига кўра эса, мусулмонлар шариат қонунлари билан яшашлари керак. Демак, яқинда Ғарб давлатларида, қолаверса, ҳамма демократик давлатларда, “Бирлик” лидери Абдураҳим Пўлат аввалдан башорат қилиб келаётганидек, мусулмонлар учун дин эркинлиги бўлмайди.

Аввалги хабарларимиздан маълумки, ниқоб-чачвонларни Франция, Бельгия, Болгария давлатларида, Швецария ва Германиянинг баъзи қисмларида аллақачон тақиқлаб бўлишган. Мана энди гал бутун Германияга келмоқда. Бу ҳали ҳолва, Ислом динида фундаментал ислоҳотлар ўтказилмаса, насроний мамлакатларда ҳижобни, мачитларни ва ҳатто мусулмончиликни тақиқлашга навбат келади.