Кеча французларнинг Жанубий Америка қитъасидаги Франция Гвианаси номли ҳудудларида жойлашган Куру космодромидан Туркия ҳарбий кучларига ишлайдиган Кўктурк-1 номли ер йўлдоши фазога учирилди. Бу ер йўлдоши Туркиянинг буюртмаси билан италянларнинг Telespazio ва французларнинг Thales Alenia Space ширкатлари тарафидан тайёрланган.

Ер йўлдошининг номидаги “кўк” сўзи “осмон”, “фазо” маъносида ишлатилгани ўзбеклар учун тушунарлидир.

Кўктурк-1 ҳар 90 дақиқада Ер юзини бир марта айланиб чиқади ва Туркия устидан ўтаётганда Туркия ҳарбийларига шу 90 дақиқада Ер юзининг турли нуқталаридан олинган 60 минг расмни юборади. Яъни, бу - ривожланган давлатларда оддий қуролга айланган разведка (истиҳборот) аппарати.

Туркиянинг давлат Анадолу хабар агентлиги билдиришича, бу ер йўлдошининг учирилишни Президент Ражаб Эрдўғон жонли ёйинда (Интернет орқали бўлса керак) кузатган ва сўнгра бу ҳақда турк журналистларига баёнот берар экан, Туркиянинг ўзи бундай ер йўлдошларини ўзи яратиши, бу ҳақда ўйлаш кераклиги ҳақида гапирган.

Ражаб Эрдўғон шундай нарсаларни ҳам ўйлаётган бўлса, уни олқишлаш керак. Шу пайтгача, у Туркияни исломий давлатга айлантириш, ҳамма турк аёлларини ҳижобга ўрашдан бошқа нарсани ўйламаса керак, деган тушунчалар ҳукмрон эди. Қолаверса, у билиши керакки, 1993 йили Истанбулда Ўзбекнинг буюк фарзанди Боймирза Ҳайитнинг 75 йиллиги нишонланаётган тантанали мажлисда нутқ сўзлаган “Бирлик” лидери Абдураҳим Пўлат Турк Дунёси ўз атом бомбасини яратиш устида ўйлаш вақти ҳам келди, деган эди.

“Ҳечдан кўра кеч” деганларидек, турклар энг камида ўз ер йўлдошларини яратиш каби замонавий масалалар устида ўйлашга бошлашса, Ражаб Эрдўғоннинг исломий давлатчилик ва ҳижоб каби нарсалар устида ўйлашга вақти ҳам қолмасди. Унутмайликки, Ислом дунёсининг қолоқ ва қашшоқлигининг асл сабаби - мусулмонлар фақат ҳижоб каби нарсларни ўйлаб, ривожланиш устида ишлаш кераклигини ҳаёлларига ҳам келтирмаганларидадир.