Ўзбеклар ўзларининг на бугунги аҳволи на келажагини ўйламасдан, миллат сифатини йўқотиб подага айланиб бораётгани, балки, айланиб бўлгани ҳақида “Ҳаракат” жуда кўп ёзмоқда. Қуруқ ёзмаяпти, аниқ фактлар билан бу фикрнинг тўғрилигини исботлаб бериш билан бир қаторда, ўзбекларни бу аҳволдан чиқариш учун курашмоқда.

Аммо, одамзоднинг келажаги ҳақида айтилаётган тахминлар “Ҳаракат” беҳуда уринаётганини, ўзбеклар онгли равишда подага айланиб, тўғри қилаётганларини кўрсатаётгандек бўлмоқда.

2015 йил 30 январда эълон қилинган “Сунъий ақл одамзодни ўлимга олиб кетадими? Ҳа, дейди Microsoft асосчиси, дунёнинг энг бой одами Билл Гейтс ва машҳур олим Стивен Хокинг. Йўқ, бунинг олдини олиш мумкин, дейди Абдураҳим Пўлат” сарлавхали хабаримизда бу мавзуни илк марта тилга олган эдик. Ўша хабар билан бугунги хабар охиридаги линк орқали танишиш мумкин.

Ҳозир олимлар сунъий интеллект 75 йилдан кейин одамзодни йўқ қилиши мумкинлиги, сунъий интеллект бўлмаса ҳам, Қуёш энергиясинининг таъсирида Ер қайнаш нуқасига келиши ва 200 йилдан кейин Ерда ҳаёт битишини айтмоқдалар.

Шундай экан, ўзбеклар миллат сифатини йўқотаётганлари ва подага айланаётганлари билан ишлари йўқлиги тўғри эмасми? Ҳа, тўғри. Ўзбеклар аслида ҳаммадан ақлли эканликларини яна бир марта кўрсатмоқдалар, холос.

Абдураҳим Пўлатнинг ўзбеклар номидан ёзган қуйидаги шеъри ҳам мутлақо тўғри бўлиб чиқмоқда:

Қуёш чиқди, ботади ҳам албатта,
Нонушта бор, ош ейиш бор навбатда,
Бўш қолмаймиз иккисининг орасида,
Ўтирамиз кучаниб туалетнинг бошида.

Бизга бошқа нима керак?
Ўзига бек ўзбекмиз!
Юраверсин бошқалар
Бош ишлатиб ҳар ерда.

Ростанам, 200 йилдан кейин Ерда ҳаёт битадиган бўлса, ҳозир бош ишлатиб яшашнинг нима кераги бор?