Аввалги хабарларимиздан бирида Туркия Президенти Ражаб Эрдўғоннинг БМТ Бош Ассамблеясидаги нутқидан бир парча келтириб, “Эрдўғон шундай дейишгача борди” деб уни камситгандек бўлган эдик. Ростдан ҳам, Эрдўғон ўз нутқида Фатхулла Гулен ташкилотининг одамлари жуда кўп давлатларнинг расмий органларига кириб олганларини айтар экан, “Келажагимизни ўйлаб, БМТнинг ҳамма давлатларини бу ташкилот билан курашишга чақираман. Буни бугун қилмасак, эртага кеч бўлади. БМТ давлатлари бу ташкилотнинг хавфи остидалар” дейишгача борган эди.

Туркияда онамухолифат партияси, яъни Жумҳурият Халқ Партиясининг лидери Кемал Қиличдорўғли (расмда) биздан ҳам олдинга кетиб, Эрдўғоннинг нутқидан уялганини айтибди. “Жумҳурият” газетаси Қиличдорўғлининг ўз партияси Маркзий Кенгаши мажлисида айтган қуйидаги гапларини келтирди: “Ражаб Эрдўғоннинг БМТдаги нутқини эшитар экан, унинг юртдоши сифатида, онамухолифат партияси раҳбари сифатида уялдим. У дунё лидерлари олдида эмас, маҳалла оқсоқоллари олдида гапираётганга ўхшарди. У ФТТни (Фатхуллачи Террор Ташкилотини – “Ҳаракат”) дунёга танитти, машҳур қилди. ФТТ 20 йилда қилолмайдиган ишни Туркия Президенти қилди. У гўёки дунё лидерларини огоҳлантирди, нималардир қилишга чақирди. Бошқа юртларнинг лидерлари сан каби онгсизмики, давлатнинг бутун органларни кимгадир бериб қўйсинлар. У юртларда демократия бор, дунёвийлик (яъни, секуляризм – “Ҳаракат”) бор.”

Қаранг, биз Эрдўғоннинг сўзларини бир оз киноя билан камситгандек бўлгандик, Туркиядаги онамухолифат партияси лидери эса, Эрдўғонни онгсиз одамга чиқариб, ҳақорат қилибди.