22 September 2016
07:14 - Путинга шапалоқ урган Эрдўғон ундан кечирим сўрадими? Туркияни исломий даввлатга айлантириш мақсадидан воз кечдими?
Нью-Йоркда БМТ Бош Ассамблеясида иштирок этаётган Туркия ва Украина президентлари Ражаб Эрдўғон ва Петр Порошенко кеча эрталаб учрашганлари, Эрдўғон Қрим масаласида Украина тарафида эканлигини айтгани, “Ҳаракат” буни олқишлагани ҳақида аввал хабар берар экан, “Путин билан оғиз-бурун ўпишишга қайтaдан бошлаган Эрдўғон бундай баёнотидан кейин нима бўлишини яхши тушунадими?” деган савол қўйган эдик.

Бир неча соат ўтар ўтмас, Россия парламентининг юқори палатаси – Федерация Кенгашнинг Мудофаа ва Хавфсизлик Кенгаши раисининг биринчи ўринбосари Франц Клинцевич “Эрдўғоннинг Қрим масаласида Украина тарафида эканлиги ҳақидаги сўзлари Туркия-Россия муносабатларини мураккаблаштириши мумкин” деган маънода баёнот тарқатди. Табиий, очиқча айтилмаса ҳам, бу баёнот феълан Путинники эди.

Кечқурун эса, Ражаб Эрдўғон Владимир Путинга телефон қилиб, Россия-Туркия ҳамкорлиги ва Сурия масаласини муҳокама қилгани, уни Давлат Думасига ўтказилган сайловлар муносабати билан табриклагани ҳақида икки мамлакатнинг оммавий ахборот воситалари хабар тарқатдилар.

Ҳеч шубҳа йўқки, дейди мухбиримиз, Эрдўғоннинг телефон қилишдаги асл мақсади - Порошенкога айтган сўзларининг маъносини юмашатиш бўлган. Ишқилиб, Эрдўғон Путиндан узр сўраб, “бу сўзлар қримтатарлар билан муносабатларни ёмонлаштирмаслик учун, шунчаки айтилган” деган бўлмасин.

Ҳозир Ражаб Эрдўғондан ҳар нарсани кутиш мумкин. У БМТ Бош Ассамблеясидаги нутқида Фатхулла Гулен ташкилотининг одамлари жуда кўп давлатларнинг расмий органларига кириб олганларини айтар экан, “Келажагимизни ўйлаб, БМТнинг ҳамма давлатларини бу ташкилот билан курашишга чақираман. Буни бугун қилмасак, эртага кеч бўлади. БМТ давлатлари бу ташкилотнинг хавфи остидалар” дейишгача борди. Ваҳолангки, Эрдўғоннинг розилиги билан Туркиянинг давлат органларида ўрнашиб олган фатхулла-гуленчилар 2014 йилнинг декабрь ойида Эрдўғон ҳукумати ичидаги порахўр ва коррупционерларнинг шармандасини чиқаришга қаратилган ҳаракат бошламасларидан аввал, Ражаб Эрдўғон ва Фатхулла Гулен ҳамкор эдилар, уларнинг мақсади Туркияни исломий давлатга айлантириш эди.

Нима, энди Эрдўғон бу мақсаддан воз кечдими? Йўқ, у ўзи билан тахт талашаётган Фатхулла Гулендан қутилиш учун дунёнинг ёрдамига муҳтож бўлиб қолганга ўхшайди.

Франс Пресс Агентлигидан олинган расмда - Фатхулла Гулен ва Ражаб Эрдўғон.
« Олдинги хабар Хабарлар рўйхати Кейинги хабар »