18 July 2016
08:28 - Туркча масхарабозлик, ёки “Ҳаракат”нинг башоратларини тасдиқлаш: Фатхулла-гуленчилар ерга кўмиб қўйган 11 милтиқ топилибди
Эрдўғон раҳбарлигидаги исломчилар ҳукуматининг тарафдори эмаслиги билан танилган “Миллиёт” газетаси хабар беришича, Истанбулнинг Осиё қисмидаги Бейкоз номли жойда фатхулла-гуленчилар тарафидан ерга қўмиб қўйилгани иддао этилаётган катта қурол омбори топилибди. Бу иш бўйича, бир майор ва ундан ҳам кичкинароқ унвонли яна бир офицер қўлга олинибди.

Ерга кўмилган бу омбордаги қуроллар эси жойида бўлмаган одамнигина ваҳимага солиши мумкин. У ерда 11 та (!!!), ҳа, айнан ЎН БИТТА милтиқ ва бир даста ўқ бор экан.

Қаранг, армия ичида ҳам ўз структураларини яратиб олган, Эрдўғон ҳукуматига қарши учоқ вертолетлар билан хужумлар уюширган, Истанбул ва Анқара кўчаларига танклар билан армиянинг бир қисмини олиб чиқишга кучи етган фатхулла-гуленчилар 11 та милтиқни ер остига кўмиш билан ҳам шуғулланишибди. Фараз қилайлик, уларнинг яна шунга ўхшаш 100 та омбори бор. Шундай бўлса ҳам, милтиқлар сони 1 минг 100 та, яъни айтишга ҳам арзимайдиган нарса бўлади. У ҳолда тан олиш керакки, ёки шунча милтиқ кўмиш билан овора бўлган фатхулла-гуленчилар аҳмоқ, ёки уларни давлат тўнтариши уюштиришда айблаётган, шундай омборлар ҳақиидаги хабарларни “Миллиёт” каби газеталарда ҳам чиқартираётган Эрдўғон ҳокимиятидагилар аҳмоқ.

Лекин, минг афсуски, Туркиядек давлатнинг оммавий ахборот воситалари шунқа хабарлар тарқатиш билан машғуллар. Бу хабарлар уларга Туркия расмийлари тарафидан тиқиштирилаётганини ҳисобга олсак, аҳвол хабарлардагидан ҳам ғариб кўринади.

Ҳозир бу масхарабозлик/ақмоқликларга эмас, Туркиянинг эртанги куни нима бўлади деган саволга жавоб қидиришга эътибор бериш керак.

Жавоб эса, аниққа ўхшайди. Давлат тўнтаришига уриниш каби кўринаётган воқеаларда ғолиб чиққан Ражаб Эрдўғон Туркияни исломлаштириш жараёнларини ўта тезлаштиради. Бошқа туркий давлатлардаги дунёвий диктатуралар билан исломий диктатурага айланаётган Туркия ўртасидаги алоқалар янада камаяди. Турк Дунёси тушунчаси бугун учун актуаллигини йўқотади.

“Ҳаракат” айнан шуларни башорат қилиб, келажагимиз учун хавотирлигини билдириб келарди.