Аслида, Туркия нима бўлаётганини тушуниш қийин. Ражаб Эрдўғон халқни майдонларга чиқишга чақирганидан, у ҳокимиятни йўқотгандек кўринади. У Германиядан бошпана сўраб, у ерга қочгани ҳақида ҳам тасдиқланмаган хабарлар бор.

Аммо, бошқача хабарлар ҳам кўп. Тўнтариш қилишга уринган ҳарбийлар, Қуролли Кучлар Бош штабининг бошлиғи Хулиси Ақарни гаровга олгани, Бош штаб биноси исёнчилар тарафидан ўққа тутилаётгани ҳақида ҳам хабарлар тарқатилмоқда. Агарда шундай бўлса, исёнчилар ғалаба қозонишига ишонч кескин камаяди. Одамлар Эрдўғоннинг чақириғи билан катта шаҳарларда майдонларга чиқмоқдалар. Аммо, вақт ярим кечаси эканлигини ҳисобга олиб тахмин қилиш мумкинки, кўп одам ташқарига чиқмайди. Туркия телеканалларининг кўрсатувлари ҳам бу иддаони тасдиқламоқда.

АҚШ ва Россия ташқи ишлар вазирлари Жон Кери ва Сергей Лавров жуда эҳтиётлик билан Туркияда барқарорлик сақланиб қолиши тарафдорлари эканликларини ва ҳамма тушунмовчиликлар қонунлар доирасида ҳал этилиши тарафдори эканликларини билдирдилар.