“Миллиёт” газетасининг хабарига кўра, Анқара прокуратураси ҳозир АҚШда яшаётган исломчи Фатхулла Гуленни Туркияга тутиб бериш талабини асословчи ҳужжатларни мамлакат Адлия вазирлигига бугун юбормоқчи.

Фатхулла Гулен жиддий фрибгарликда, расмий ҳужжатларни қалбакилаштиришда, тухматчиликда, жиноий йўллар билан қўлга киритилган бойликларни оқлатишда, бировларнинг гапларини яширинча тинглаш ва ёзиб олишда, инсонларнинг шахсий ҳаётига тегишли сирларни очиқлашда ва яна бир қатор жиноятларда айбланмоқда экан. Табиий, энг катта жиноят сифатида унинг жамоати Туркиянинг суди, армияси, хавфсизлик хизмати ва бошқа идораларида ташкилотланиб олгани кўрсатилади.

Маълумки, Туркияда Фатхулла Гулен ва унинг тарафдорлари террористлар деб ҳам эълон қилинган эди. Табиий, дейди мухбиримиз, улар террорист эмас, потенциал террористлар бўлиб, ҳозир АҚШда ҳам ўзларича ҳамма структураларда ташкилотланишни мақсад қилганлар. АҚШдаги энг катта газеталардан бири бўлган USA Today 100 га яқин АҚШ конгрессмени Фатхулла Гуленга тегишли ташкилотларнинг пули билан чет элларга сафар қилгани ҳақида катта мақола эълон қилган эди. “Ҳаракат” ўз вақтида бу ҳақда хабар берган.

Шундай экан, Туркия Фатхулла Гуленни ушлаб бериш талабини АҚШ расмийларига юбориши биланоқ, камида 100 конгрессмен бунга қарши чиқса керак. Шармандалик эмасми?