НАТО Бош Котиби Йенс Столтенберг немисларнинг Bild гезетасига берган интервьюсида Россия ўз раҳбарлик қиладиган альянс учун асосий хавф эканлигини айтибди. Бу интервью яқинда Варшавада бўладиган НАТО саммитидан олдин бўлгани ҳам диққатга сазовордир. Чунки, унинг бу интервьюдаги фикрлари саммитда ҳам айтилишини кутиш керак.

Газета НАТО Бош Котибининг қуйидаги сўзларини ҳам келтиради: “Биз кутилмаган хавфлар ва мураккаб муаммоларга дуч келдик. Булар, жумладан, чегараларни ўзгартириш учун куч ишлатишга ҳам тайёр бўлган Россиядан чиқмоқда”.

У барибир Россия билан конфронтация қилиш ниятида эмасликларини, “совуқ уруш” тарихда қолганини ва қолиши кераклигини ҳам урғулаган. Яъни, орқага чекинган.

НАТОдек кучли альянсининг Россия олдида бунчалик пастга тушиши тушунарсиз, дейди мухбиримиз. Чунки, Россия Қримни амалда, Донбассни феълан босиб олгандан кейин киритилган Ғарбнинг санкциялари кўрсатдики, Россия Ғарбга тенг келолмайди, хусусан, у замоновий технологиялар масаласида жуда кучсиз.

Тўғри, Россиянинг СССР замонидан қолган қуроллари ва ядровий бомбалари бор. Буни ҳисобга олмаслик мумкин эмас. Аммо, Йенс Столтенберг “Бирлик” лидери Абдураҳим Пўлатдан ўрганса эди, Россиянинг бундай кучини чиройли баҳолаб, унинг устидан мазза қилиб кулиш мумкин эди.

Эслатиб ўтамиз, “Бирлик” лидери Абдураҳим Пўлат 2008 йилдаги Россия-Гуржистон урушидан кейин ёзган ва “Ҳаракат” журналининг ўша йилги 4-чи сонида эълон қилинган “Кенигсберг-Курил муаммолари ва Россия- Гуржистон уруши” номли мақоласида, жумладан, шундай деган эди:

“Ҳозирги Россияни Ўрта Шарқ мамлакатларида модага кирган тирик бомба-аёллар билан солиштириш мумкин. У бомба-аёлларнинг белида бир неча граната ёки бомбача боғланган, Россиянинг белида эскириб қолган бўлса ҳам дунёни йўқ қилоладиган атом ва ядровий бомбалар бор. Демак, Россияни куч билан енгиб бўлмайди.”

Тўғри, белида шунча атом бобмбаси бор бўлган Россияни куч билан енгиб бўлмайди, чунки, у енгилаётганини кўриши билан белидаги бомбаларни портлатиб, бутун дунёни йўқ қилади. Демак, у бомбаларни портлатишнинг олдини оладиган йўлларни қидириш керак.

Йенс Столтенбергдек одам айнан шу йўлларни қидириш ҳақида гапириши керак эди.

Абдураҳим Пўлатнинг мақолси билан шу адресда танишиш мумкин - http://www.harakat.net/harakat/?id=826

Мақоланинг русча таржимаси русларнинг Центразия ва гуржиларнинг Грузия-Online cайтларида эълон қилинган.