03 July 2016
02:15 - Арманилар лоббиси яна ҳаракатда: Франция параментининг қуйи палатаси арманилар қирғинини инкор этганларга жазо киритди
Туркларнинг “Миллиёт” газетаси хабар қилишича, Франция парламентининг қуйи палатаси – Франция Миллий Мажлиси - 1915 йили арманилар турклар тарафидан қирғин қилингани, 1,5 миллион армани ўлдирилганини инокор этувчиларга 45 минг евролик жарима ва бир йилгача қамоқ жазоси киритибди.

Бундай жазолар инсониятга қарши жиноятларни жазолаш ҳақидаги Францияда аввалдан бор бўлган қонунларга қўшимчалар киритиш шаклида жорий этилган.

Бу ўзгартиришлар Франция Миллий Мажлисининг 577 депутатидан бор-йўғи 21 (!!) киши қатнашган мажлисда бир овоздан қабул қилинибди. Шундан ҳам кўриниб турибдики, арманилар лоббиси олиб бораётган фаолиятни кўр-кўрона қўллаб-қувватловчи француз депутатлар кўп эмас.

Бу қабул қилинган қонун кучга кириши учун, у парламентнинг юқори палатаси Сенатдан ҳам ўтиши ва президент тарафидан тасдиқланиши лозим.

Эслатиб ўтиш керакки, 2011 йилнинг охири ва 2012 йилнинг бошида ҳам Франция параламентининг иккала палатаси шу каби қонун қабул қилган, аммо Конституцион Суд бу қонунни мамлакат Конституциясига зид деб топган эди. Бунинг устига, 2012 йил 7 мaйда ўтказилган президент сайловида ўша қонуннинг ташаббусчи бўлган ва армани лоббисининг тарафдори деб ҳисобланаётган Николя Саркози Социалистик Партиянинг лидери Франсуа Олландга ютқазиб, президентликдан кетган эди. Қисқа қилиб айтсак, ўшанда арманилар лоббиси охир-оқибатда мағлубиятга учраганди.

Кўрамиз, ҳозир воқеалар қандай ривожланаркин. Бошқа тарафдан, арманилар лоббисининг тиниб-тинчимаслигини тан олиш лозим.