02 July 2016
02:24 - Нью-Йорк фондлар биржаси Буюкбританиянинг ЕИдан чиқишига тупирди
Маълумки, Буюбритания ўтган жума, яъни 24 июндаги референдум натижалари бўйича Европа Иттифоқидан чиқиши маълум бўлиши билан, Нью-Йорк фондлар биржасининг асосий кўрсатгичи бўлган Dow Jones индекси ўша куниёқ тахминан 600 поғонага, кейинги иш куни бўлган душанбада, яъни 27 июнда, яна 300 поғонага тушиб, икки иш кунида тахминан 900 га чўққан ва 17200 лар остида тўхтаган эди.

Айтиш мумкинки, АҚШ иқтисодининг аҳволини ҳам ўзида акс эттирувчи Нью-Йорк фондлар биржаси шокка тушган эди. Аммо, кейинги кунлар Dow Jones секин-аста тиклана бошлади ва кеча бу ҳафтанинг охирги иш куни тамом бўлганда 17950 га тенг бўлди.

Эслатиб ўтамиз, Dow Jones индекси сўнгги ойларда 18 мингнинг бироз остида зиг-загли ўйнаб турарди. Демак, у ўзини тиклаб олди, Brexit (British Exit – Британиянинг чиқиши, яъни ЕИдан чиқиши, сўзларининг инглизча қисқартмаси) воқеасига тупирди ва тўппа-тўғри 1 ҳафатадан кейин аввалги ҳолига қайтди.

Агар Нью-Йорк фондлар биржаси ва унинг Dow Jones индекси “Ҳаракат”га қулоқ солсайди, 1 ҳафта бизнесс эгаларини бунчалик ташвишга солмаган бўларди. Чунки, айнан “Ҳаракат” Буюбританининг ЕИдан чиқиши дунёда катта тебранишларга йўл очмаслигини аввалдан башорат қилган эди.

Хуллас, авваллари кўп марта айтилган фикримизни яна бир марта қайтариш фойдали деб ҳисоблаймиз.

АҚШда ишлаётган ўзбеклар ҳам, бошқа мамлакатларда яшаётган ўзбеклар ҳам, фондлар бозорида кетаётган жараёнлар билан қизиқишлари, қўл билан ушлаб бўлмайдиган, кўзга кўринмайдиган Dow Jones каби индекслар билан яшашни ўрганишлари, пулларини фақат банкларда эмас, фондлар бозорининг акцияларида ҳам сақлашни ўрганишлари лозим.

Ўзбекистондаги ота-оналарга ёрдам бериш шарт, аммо у ерга ортиқча пул юбориш пулни сувга оқизишдир. Ўзбеклар чет элларда ҳам ош ейиш ва Ўзбекистонга пул юбориш билан машғул бўлишдан ташқари, ишлаётган мамлакатларида пул йиғиб, кичкина бўлса ҳам ўз бизнесларини очиш устида ўйласалар, фойдали бўлади.

Айнан шундай одамлардан кейинчалик катта бизнесменлар чиқади. Ана ундан кейин Ўзбекистонда ҳам бизнес очишни ўйлаш мумкин. Акс ҳолда, бутун дунёни мардикорлар билан тўлатиб юраверамиз.

Тўғри, ҳозир ҳатто АҚШда майда эмас, йирик бизнес билан шуғулланишни бошлаган ўзбеклар пайдо бўлмоқда. Айнан улар Нью-Йорк фондлар биржасини кузатиб боришлари кераклиги ўз-ўзидан маълум.

Расмда - Нью-Йорк фондлар биржаси ҳам жойлашган машҳур Wall St (Уолл-стрит).
« Олдинги хабар Хабарлар рўйхати Кейинги хабар »