Хабаримиз сарлавҳасининг биринчи қисми Reuters Агентлигининг хабаридан олинган. Бу агентлик Барак Обама ҳукуматининг одами, аниқроғи, Ғазна вазири Жек Люнинг қуйидаги сўзларини келтиради: “Brexit (Британиянинг ЕИдан чиқиши – “Ҳаракат”) АҚШнинг иқтисоди учун яна бир чақириқ, биз учун қўшимча қарши шамолдир. Аммо, мен ўйлайманки, биз ҳам, ЕИ ва Буюкбритания ҳам, жараёнларни бошқароламиз. Кўрдингиз, сиёсатчилар (референдумдан) аввал ҳам кейин ҳам, жуда маъсулиятли ҳаракат қилмоқдалар. Молиявий кризиснинг ривожланиши бўлмайди”.

Аммо, аҳвол бошқача, дейди мухбиримиз. Ўтган жума куни, вақт фарқи сабабли, Буюкбританиядаги референдум натижалари маълум бўлган пайтда, Нью- Йорк фондлар биржаси энди очилаётган эди. Биржа очилиши биланоқ унинг асоий кўрсатгичи бўлмиш Dow Jones индекси 500 поғана тушиб кетди. Кейин тушиш бунчалик кўп бўлмаса ҳам, кечқурун биржа бекилганда умумий тушиш 600 дан ошиб кетганди.

Кеча биржа икки кунлик дам олишдан кейин очилгандан кейин ҳам тушиш давом этди ва куннинг охиригача тушиш тахминан 255 бўлди. Яъни, икки иш кунида Dow Jones индекси тахминан 900 га чўккан эди. Яъни, икки кунлик тушиш сал кам 6 фоиз. Бу дегани ҳамма ширкатларнинг акциялар қиймати ўртача 6 фоизга тушиб кетди. Демак, ҳамма катта зарар кўрмоқда.

Аммо, биз ҳам тахмин қилаётгандек ва АҚШ вазири айтаётгандек, дунё британияликларнинг қарори олдида тиз чўкмайди. Ҳамма нарса тезда тикланиши керак.