Афсонавий боксер Муҳаммад Али бугун фақат ўзига яқин бўлган одамларнинг иштирокида тупроққа берилади. Шу дақиқаларда унинг тобути қўйилган автомобиль унинг ўзи туғилиб ўсган Кентакки штатидаги Луисвилл шаҳри кўчалари бўйлаб тантанали ва хайрлашув юриши қилмоқда. У шу шаҳардаги қабристонда кўмилади.

Аммо, жаноза намози кеча мингларча кишининг иштирокида ўқилди. Шу пайтда жанозада қатнашаётган Туркия Президенти Ражаб Эрдўғон Муҳаммад Алининг усти ёпиқ тобути, яъни мусулмонча бўлмаган тобути устига Каъбанинг кўринишлари тўқилган чойшабни ёпмоқчи бўлганда, ташкилотчилар “буни кейин ўзимиз ёпамиз” деб уни олиб қўйибдилар. Жойи келгани учун эслатиш керакки, АҚШда оламдан ўтган одам фақат ва фақат ёпиқ тобутда тупроққа берилади. Бу нарса ҳам АҚШда тўла дин эркинлиги йўқлгининг кўрсатгичларидан биридир.

Сўнгра Эрдўғон ўзи билан бирга келган Туркия муфтийси (расмий тилда – Диёнат ишлари вазири) Меҳмет Гўрмез билан Қуръондан парчалар ўқиб, дуо қилмоқчи бўлганда, бунга ҳам йўл берилмабди. Бундан ғазабга келган Туркия Президенти икки кунлик сафарини бир кунга қисқартириб, мамлакатига қайтибди.

Бу ҳақда хабар берган, Туркияда чиқадиган “Ҳуррият” ва “Жумҳурият” газеталарига кўра, Ражаб Эрдўғон жаноза ўқиладиган жойга келганда унинг қоровулларидан бири билан америкалик хавфсизлик хизматчиси ўртасида жанжал ҳам чиққан. Шундай бўлса ҳам, Ражаб Эрдўғон кеча Кентакки Аҳиска Турклари Марказида аҳиска, яъни месхет туркларининг ифторида иштирок этишдан воз кечмаган. Расмда айнан ўша ифтордан бир лавҳани ва Эрдўғоннинг паришон ҳолини кўриш мумкин.