05 June 2016
18:17 - Кеча бошланган уч тарафлама ҳужум натижасида ИШИД йўқ бўлади, аммо терроризм эмас
Жаҳон ахборот воситалари ИШИДга уч тарафдан ҳужум бошланганини билдирмоқдалар.

Ҳужумларнинг биринчиси ИШИДнинг пойтахти ҳисобланадиган Ракка шаҳрининг ғарбий қисмига қарши бошланди. Бу ҳужум Россиянинг ёрдами, балки, иштирокида Сурия қўшинлари тарафидан уюштирилмоқда.

Иккинчи ҳужум эса, айнан шу пойтахт Ракканинг шарқий қисмига суриялик курдларга оид Бирлашган Демократик Партиянинг Халқ Мудофаси Бирлиги номли қаноти, тўғрироғи, армияси тарафидан уюштирилмоқда.

Ракканинг ғарбида ҳам, шарқида ҳам, шиддатли жанглар кетаётгани, ИШИД кучлари шаҳарнинг баъзи қисмларини қўлдан бергани айтилмоқда.

Ироқда эса, ҳозир ҳокимиятда бўлган шиаларнинг армияси ИШИДнинг бу мамлакат ҳудудларидаги қалъаларидан бири бўлган Феллужага ҳужум бошлади. Буни учинчи ҳужум деб айтиш мумкин. Бу ерда ҳозирча шиаларнинг айтишга арзийдиган ютуқлари йўқ.

АҚШ раҳбарлигидаги “ИШИДга қарши коалиция” бу воқеаларда тамошабин бўлиб қолишга рози бўлганидан тахмин қилиш мумкинки, Ғарб нафақат Сурияда, балки, бутун Яқин Шарқда Россия ва Эрон коалицияси асосий кучга айланишини, энг камида, бу босқичда тан олмоқчи.

Айнан шунга ўхшаш фикрни Туркия ҳақида ҳам айтиш мумкин: Туркия Ироқда каби Сурияда ҳам курдларнинг феълан мустақил давлати тузилишига қаршилик кўрсатолмаслигини тан олмоқчи. Бу нарса Туркиянинг ичидаги аҳволни ҳам ёмонлаштиради, курд террористларини рағбатлантиради.

Туркия Президенти Ражаб Эрдўғон эса, уч кундан бери Африканинг Кения, Руанда ва Сомалия мамлакатларида сафарда эди (топган жойига қаранг!), бугун у Истанбулда бир жоменинг таъмирлашдан кейинги очилиш маросимда иштирок этди.

ИШИДнинг қулаши ислом терроризмининг битиши эмаслигини “Ҳаракат” йиллардан бери айтиб келмоқда, дейди мухбиримиз. Ислом терроризмининг илдизлари Исломнинг ҳозир қабул қилинган хато тушунчларида эканлиги сабабли, Исломда фундаментал ислоҳотлар ўтказилиб, Ислом дунёвийлик/секуляризм принципини қабул қилмагунча, ислом терроризми битмайди.