03 June 2016
23:06 - Андижонда қўғирчоқ театри янги бинога кўчди, Ўзбекистон қачон кўчади?

Хабарчилик деган нарсани масхарабозликка айлантириб бўлган Ўзбекистон Миллий Ахборот Агентлиги жиддий хабарлар ҳам беришга бошлаганидан хурсанд бўлиш керак. Унинг хабаридан маълум бўлишича, Андижонда вилоят қўғирчоқ театри икки қаватли янги бинога кўчибди. Янги бинонинг 300 тамошабин сиғадиган зали бор. Минг афсуски, зал жуда кичкина.

Шу кунларда бу бинода 10-чи Республика қўғирчоқ театрлари мусобақаси бўлмоқда. Кўрамиз, қўғирчоқбозликда қайси вилоят олдинда экан.

Маълумки, Ўзбекистон Президенти Ислом Карим ҳар қадамда мамлакатимизда демократик жараёнлар ривожланиб ва чуқурлашиб бораётганини гапиради, амалда эса, демократия масаласида дунёнинг энг орқадаги мамлакатларидан биримиз. Тўғрироғи, демократия ва инсон эркинликлари бўйича жаҳонда охиридан иккинчимиз. Биздан орқада биттагина мамлакат бор – Сомалия.

Шу маънода Ўзбекистоннинг ўзи катта қўғирчоқ театри эканлигини тан олиш ва айнан қўғирчобозликда ҳаммадан олдинда эканлигимиз билан фахрланиш керак. Қолаверса, Андижондаги театрга фақат 300 киши сиғиши ҳам унчалик муҳим нарса эмас, чунки, ўзбек профессорлари қозоқ дворникларидан кам маош оладиган ҳолга тушгани ва шунга кўникиб ўтирганини ҳисобга олсак, мамлакатнинг ўзи катта қўғрчоқ театри эмасми?