Ражаб Эрдоғон лидерлигида 2001 йилда тузилган исломчиларнинг Адолат ва Тараққиёт Партияси ўз тарихидаги 3-чи раисини сайлади. Биринчи раис Ражаб Эрдўғоннинг ўзи бўлганди. У айни замонда Бош вазир ҳам бўлган. У 2014 йили президентликка сайлангач, Аҳмад Довудўғли партия раиси ва Бош вазир лавозимларига келтирилди. Аҳмад Довудўғли Эрдўғоннинг ишонган одамларидан бири эди. Аммо, сўнги ойларда уларнинг орасига тушуниб бўлмайдиган совуқлик тушди ва, кўринишидан, Эрдўғоннинг талаби бидан Довудўғли шу йил 29 апрелда сабаб кўрсатмасдан партия раислигидан кетиш истеъфосини эълон қилди. Табиий, у бош вазирликдан ҳам кетиши аниқ эди.

22 майга навбатдан ташқари партия қурултойи тайинланганди. Бугун бу қурултойда, бузилган бир нечта бюллетенни ҳисобга олмасак, партиянинг тузувчиларидан бири, шу пайтгача парламент аъзоси ва айна замонда Tранспорт, денгизчилик ва хабарчилик вазири ҳам бўлган Бинали Йилдирим (расмда) бир овоздан партия раиси этиб сайланди. У бир неча кун ичида Бош вазир этиб тайинланиши кутилмоқда.

Бинали Йилдиримнинг қурултойдаги нутқи Эрдўғон шахсига сиғинишдан бошқа нарса бўлмади. У ўз президентига содиқ эканлигини қайта-қайта таъкидлашдан ташқари, унинг истаги бўйича Туркиянинг “президент республикасига” айлантиришга ваъда берди. Шу пайтгача Туркия парламент республикаси эди.

Мавжуд Конституцияга кўра, ҳеч бир партияга аъзо бўлолмайдиган Президент Ражаб Эрдўғон феълан ўз партияси қурултойига табрик хати юборган экан, бутун қурултой уни оёқда туриб эшитибди. Яъни, шахсга сиғиниш очиқча бўлмоқда.

Аҳмад Довудўғли хайрлашув каби нутқ сўзлаб, дарҳол қурултойни тарк этди. Партиянинг 50 кишилик Маркзий Кенгаши қайтадан сайланди, 24 киши аввалги таркибда йўқ одамлар экан.

Бу қурултой ва янги раис сайланиши Туркия тарихида бурилиш нуқтаси бўлиб, аввал дунёвий диктатура, кейин исломий давлат қуриш йўлининг ҳал қилувчи босқичларидан бири бўлиб қолишининг эҳтимоллиги жуда катта. Агарда дунёвийлик тарафдори бўлган партиялар бирлашиб, бунинг олдини ололмасалар, айнан шундай бўлади. Орада қонли воқеалар ҳам бўлиши мумкин.

Дарвоқе, турклар "минг"ни "бин" дейдилар, "йилдирим" эса, "чақмоқ" дегани. Демак, янги раиснинг исмини ўзбекчасига Мингали Чақмоқ дейиш мумкин.