Бугун, 21 майда Тошкентда ўтказилиши мўлжалланган “Бирлик” Партияси Марказий Кенгашининг мажлиси кечиктирилди. Партия Марказий Кенгаши Бош котиби, Ўзбекистон инсон ҳуқуқлари “Эзгулик” жамияти раиси Васила Иноятнинг “Ҳаракат” мухбирига билдиришича, мажлиснинг ўтказилмаслигига вилоятлардаги партия фаолларининг пойтахтга келишига йўл берилмагани сабаб бўлган.

Хусусан, 19 май куни Васила Иноят Ўзбекистон Адлия вазирлигининг Жамоат ташкилотларини рўйхатга олиш бошқармасига чақиртирилган ва унга пойтахтда шу йилнинг 1-2 июнь кунлари Шанхай Ҳамкорлик Ташкилоти саммити ўтказилиши муносабати билан кучайтирилган тартиб ўрнатилгани, анжуман ва мажлисларнинг ўтказилишига рухсат этилмаётгани билдирилган.

Бошқарма бошлиғи ўринбосари Васила Иноятга ҳуқуқни муҳофаза қилиш органлари мажлисда иштирок этиш учун Тошкентга келишни режалаштираётганларни ўз жойларидан чиқартирмаслик ҳақида буйруқ олганларини ҳам айтган.

“Ҳатто бугун участка нозири уйимга келиб, паспорт бўйича режим амалда ишлаётгани, дам олиш куни “Эзгулик” ҳам ишлаши мумкинмаслигини таъкидлади. Кейин маълум бўлдики, вилоятларда Тошкентга бормоқчи бўлган бирликчиларни уйларидан ҳам чиқаришмабди. Шу боисдан ортиқча конфликтга бориб ўтирмасликка ва бугун мажлис ўтказмасликка қарор қилинди”, дейди Васила Иноят.

Вилоятлардан олинган хабарлар ҳам кўрсатдики, “Бирлик”чилар турли баҳоналар билан уйларидан чиқарилмаган ва пойтахтда ўтказиладиган Марказий Кенгаш мажлисига келтирилмаслиги таъминланган.

21 майда охирги йилларда биринчи марта Марказий Кенгашимиз мажлисини ўтказиш ҳақидаги қароримиз анча аввал аъзоларимизга билдирилган эди, мен режалаштирилаётган кун тартибидаги масалалар бўйича ўз фикрларимни аввалдан мактуб сифатида ёзиб Тошкентга жўнатган эдим, дейди ҳозир мажбуран АҚШда яшаётган партия раиси Абдураҳим Пўлат.

Кун тартибининг “"Бирлик" фаолиятини жонлантириш ва бунинг шакллари” деб аталган биринчи ва асосий масаласи бўйича ўша мактубимда шундай сўзлар ёзган эдим: “Эслатиб ўтаман, 1990 йилнинг май ойида “Бирлик” халқ ҳаракатининг 2-чи қурултойида шундай деганман: “Мақсадимиз СССРни йиқитиш эди, уни йиқилиш арафасига келтириб бўлдик. Аммо, бу даҳшатли дарахт йиқилса, унинг остида катта вайроналар бўлади. Демак, энди мақсадимиз, уни ўз қўлимиз билан секин-аста ерга ётқизиш ва ундан кейинги ҳаётимизни ўйлаш бўлиши керак.” Ҳозир ҳам шунга ўхшаш воқеа арафасидамиз. Мавжуд режим қулаш арафасида. Аммо, у қулаганда кўп нарсани вайрон қилиб кетади. Демак, эҳтиёт бўлиш, етти ўйлаб бир кесиш лозим”.

Абдураҳим Пўлат ўз сўзларини “Ҳозирги режимнинг қаршилигига қарамасдан бугун мажлисимизни ўтказиш учун ҳаракат қилса бўларди. Аммо, эҳтиёткорлик ҳақидаги фикрларимиздан ҳам келиб чиқиб, бугунги мажлисни кечиктириш ҳақида қарор олдик ва буни жойлардаги аъзолларимизга вақтида билдирдик” деб тамомлади.

Васила Иноятга кўра, мажлис июнь ойининг дастбалки ўн кунлигида Тошкентда ўтказилади. Унда кун тартибидаги масалалар муҳокама қилинади.