АҚШнинг энг кучли ва машҳур ахборот воситаларидан бири бўлган Reuters агентлиги мамлакат бўйича ўзи ўтказган сўровнома натижаларини бироз аввал эълон қилди. Маълум бўлишича сўралганларнинг 41 фоизи бу йил бўладиган президентлик сайловларида Ҳиллар Клинтонга овоз бермоқчи, 40 фоизи эса Доналд Трампга. 19 фоиз сайловчи ҳали бу масалада аниқ фикрга келмаган.

Доналд Трамп Reuters агентлигига “бу рақамларни кўришдан хурсандман” деб жавоб берибди, Ҳиллари Клинтоннинг сайлов кампанияси бўйича матбуот котиби фикр билдиришдан қочибди.

Бундан ҳам қизиғи ва муҳими, бир ҳафта аввал, яъни 4 май куни ўтказилган сўровномаларда Клинтон тарафдорлари 48, Трамп тарафдорлари 35 фоиз бўлган экан.

Кўриниб турибдики, ҳамма нарса “Ҳаракат” агентлиги башорат қилган йўналишда кетмоқда, дейди мухбиримиз. Айнан биз сайлов камапанияси энди бошланиб, Доналд Трамп ўзининг шок терапияси усулидаги чиқишлари билан Америкада ҳаммани шокка солиб турган ва кўпчилик у жиддий натижаларга эришишига ишонмаётган бир пайтда, айнан у Республикачилар Партиясининг номзоди бўлиши ва 8 ноябрда бўладиган президентлик сайловларида ғалаба қозонишини башорат қилган эдик.

Билмаганлар учун эслатиш керакки, 2008 йилги президент сайловлари арафасида “Агар осмон узилиб ерга тушмаса, Барак Обама президент бўлади” деб башорат қилгандик ва айнан шундай бўлганди. Ўша гапларимизни Доналд Трамп учун ҳам қайтариш вақти келди.

Ҳозир шундай башорат қилаётганимизнинг асосий сабаби – аввал Украина ва кейин Суриядаги воқеалар кўрсатиб турганидек, АҚШ дунёдаги лидерлик ролини йўқотишга бошлагани, мамлакат иқтисодида барқарорлик йўқолиб бораётгани, демак, бу мамлакат жиддий ислоҳотларга муҳтож эканлиги, Доналд Трампдан бошқа ҳеч бир номзод бу реалликларни тушунмаётгани кўриниб тургани бўлганди.

Ҳа, вақти келади, “Ҳаракат” ҳақиқий хабарчи эканлигини фақат ўзбеклар эмас, ҳамма тан олишга мажбур бўлади.