Маълумки, ўтган йили 24 ноябрь куни турклар Сурия осмонида, Туркия чегарасидан 1,5 км нарида учаётган рус ҳарбий учоғини уриб туширишганди. Туркларга кўра, учоқ Туркия чегарасини бир неча марта бузган. Руслар эса, ўз учоқлари ҳеч қачон Туркия чегарасини бузмаганини иддао қилиб келмоқдалар.

Уриб туширилган рус учоғининг 2 учувчисидан бири парашютда омон-эсон ерга етиб олган ва кейин Сурия ҳарбийлари тарафидан русларга топширилганди. Иккинчи учувчи эса, парашютда тушаётган пайтида шу минтақаларда Башар Асад режимига қарши урушаётган маҳаллий туркманларнинг отряди тарафидан отиб ўлдирилди. Кейинчалик, рус учувчисини туркманларга ёрдам бериш учун келган туркиялик миллатчилардан Алпарслон Челик (расмда) отиб ўлдиргани айтилабошлади. Унинг ўзи бу иши билан мақтангани ҳам хабар қилинди.

Шу йил 31 март куни Измирдаги ресторанлардан бирида ичида Алпарслон Челик ҳам бўлган 14 кишилик гуруҳ ушланди Улар билан бирга Калашников автомати ва 2 пистолет ҳам қўлга олинган.

Бу гуруҳдагиларга аввал қонунга хилоф равишда қурол билан юриш айби қўйилди, кейин Алпарслон Челикка рус учувчисини отиб ўлдириш айби ҳам юкланди. Аммо, 37 кунлик терговдан кейин, кеча Измир шаҳар прокурори Алпарслон Челикка қарши қўйилган рус учувчисини ўлдириш билан боғлиқ айбномаларни асоссиз деб топибди. Турк ахборот воситалари бу ҳақда Измир шаҳар прокуратурасидаги исми айтилмаётган манбага асосланиб хабар тарқатдилар.

Хабарларда Алпарслон Челик озод қилиб қилинмагани, 14 кишилик гуруҳга қарши қўйилган қонунга хилоф равишда қурол билан юриш айби нима бўлгани ҳақида ҳеч нарса дейилмайди. Русларнинг бу хабарга реакцияси ҳам ҳали номаълум.