02 April 2016
08:44 - Юсуф Жума: Абдулла Орифнинг 75 йиллигига Юбилейнома
Битдим беш-ўн шеъру шоҳга ҳамд,
Сўз мулкида ўзимдирман бий.
Бор ишингни бас қил, ҳукумат,
Ўтказ менга катта юбилей.

Ким Валмаки, ким у Шайхзода,
Қошимда ким, бари олсин тин.
Ҳой, БМТ, тўй эт дунёда,
Ҳой, тождор, тақ тилимга орден.

Қани менинг мардикор халқим,
Борингни йиғ, улуғ жаноб қўй.
Ҳайкал тикла - қонуний ҳаққим,
Қолганига ўтказ шонли тўй.

Ордан кечдим, кечган ҳамма ҳам,
Нафсга кўчдим, чоғир бўлсин жўй.
Беномусга ҳар куни байрам,
Ҳар бир дами беномусга тўй.

Ҳар бир байтим - икита қўлим,
Таъма билан кун-тун чўзилган.
Тириклайин топганман ўлим
Саройларда жинсим бузилган.

Ўлдирилган жияним гўри,
Совимади, тули, алвон кий.
Бас, куйлагин кўнглим ҳузури,
Рақсга туш, ахир менга тўй.

Гарчи юртда қирғин жаноза,
Ўлик кўмма, қўй, эл, юзта қуй.
Одамзотдан ароқ ҳам тоза,
Кир ичларга юбилейдир - тўй!

2016 йил