Аввалги хабарларимизда Истанбул суди феълан фатхулла-гуленчиларники бўлган “Замон” (Zaman) газетасини эгасидан тортиб олгани, унга вақтинча иш юритувчилар тайинлагани, газета тарфдорларининг норозилик чиқиши полиция тарафидан кўз ёшартирувчи газ сепиб ва бироз куч ҳам ишлатиб тарқатиб юборилгани, Ғарб давлатлари газетанинг тортиб олинишини сўз эркинлигига қарши ҳаракат деб баҳолаганларини билдирган эдик.

Ҳозир бизга маълум бўлишича, “Замон” (Zaman) газетасининг расмий эгаси “Феза” газетачилик ширкати (Feza Gazetecilik A.Ş) экан. Демак, айнан шу ширкатнинг эгалари Фатхулла Гулен жамоаси аъзолари бўлган.

Ҳозир воқеалар шу йўналишда давом этмоқда. Кеча Истанбул суди “Феза” газетачилик ширкатиники бўлган “Жаҳон” Ахборот Агентлигини ҳам эгасидан тортиб олиб, унга вақтинчалик иш юритувчилар тайинлади. Бу тайинланган одамлар айнан ўша Замон газетасига тайинланган бошқарувчиларнинг ўзи экан.

Ҳуқуқий нуқтаи назардан қарасак, “Замон” газетаси ва “Жаҳон” Ахборот Агентлигининг эгасидан тортиб олиниши тўғри эмас, дейди мухбиримиз, аммо масаланинг бошқа тарафлари ҳам бор. Маълумки, Фатхулла Гуленнинг ўзи ҳам, унинг жамоаси ҳам, “Хизмат” ҳаракати ҳам, ўзларини замонавий, прогрессив қилиб кўрсатишга уринишларига қарамасдан, уларнинг ҳаммаси ўта реакицонердир. Бундайларнинг пропаганда воситалари бекитилиши тўғридир.

Аммо, масаланинг яна бир тарафи, учинчи тарафи бор. Ражаб Эдрўғон ва Фатхулла Гулен жамоларининг қарама-қаршилиги осонликча битмайди. Чунки, “Хизмат”нинг кучли ғояси бўлмаса ҳам, катта пули бор. Шундай экан, урушга ҳам тайёр бўлган хизматчиларнинг катта молиявий имкониятлари бор. Уларнинг очиқча уруш олиб боришга қудратлари етмайди, демак, террористик уруш йўлига ўтишлари муқаррар.

Туркияда, курдларнинг террорчилиги етмагандек, фатхулла-гуленчиларнинг террори ўртага чиқиши яхшиликка олиб бормайди. Бу – Турк Дунёси нуқтаи назаридан ҳам яхши эмас. Қизиқ, “Бирлик” лидери Абдураҳим Пўлат АҚШ Президенти Барак Обамага ёзган хатида яқин келажакда ислом терроризмининг маркази Туркия ва Марказий Осиё бўлади деганда, айнан Эрдўғон-Гулен урушини назарда тутмадимикан?