24 February 2016
19:45 - Буюбританининг ЕИдан чиқиш-чиқмаслиги бўйича 23 июнга тайинланган референдумга жанжалли тайёргарлик бошланди
19-20 февраль кунлари Брюсселда ўтказилган ЕИ саммитида Буюкбританияга муҳожирлар масаласида қандайдир махсус мақом берилса ҳам, Буюкбритания Бош вазири Дэвид Кэмерон ўз мамлакатининг ЕИдан чиқиш-чиқмаслиги бўйича референдум шу йил 23 июнда бўлишини эълон қилган эди.

Аслида, ЕИнинг Буюкбритания билан келишмовчиликлари фақат муҳожирлар масаласида эмас, Буюкбритания шунча йилдан бери еврозонага кирмаётгани каби бошқа муҳим масалалар ҳам бор. Бу референдумга тайёргарликнинг ўзи нафақат бу мамлакатда, балки, бутун Европа ва ҳатто бутун жаҳон миқёсида сиёсий барқарорсизликларга йўл очиши мумкин.

Ўз мамлакатида катта сиёсий обрўга эга бўлган Лондон ҳокими Борис Джонсон ЕИдан чиқиш тарафдори эканлигини аввалдан ҳам гапириб келарди, референдум эълон қилингандан кейин кескин баёнотлар беришга бошлади. Унга кўра, ЕИга аъзо бўлиш Буюкбританинг иш ерлари яратиш, чегараларни қўриқлаш, инсон ҳуқуқлари ва бошқа масалаларда суверенитетини бузаётган эмиш. У ташқи кўриниши ва шок терапияси усуллари билан гапириши билан АҚШда президент бўлиш учун кураш олиб бораётган Доналд Трампга ўхшаб кетса ҳам, амалда инглизларнинг овозини олишда қанчалик муваффақиятга эришиши маълум эмас.

Бугун машҳур The Times газетасининг сайтида 200 га яқин катта ширкатлар раҳбарларининг одамларни ЕИдан чиқмасликка овоз беришга чақирувчи баёноти эълон қилинди. Уларнинг фикрича, Буюкбританиянинг бизнеси аҳолиси 500 миллиондан кўп бўлган ЕИда бемалол ишлаш ва ЕИ ташқарисидаги бошқа халқаро структуралар билан ҳамкорлик қилиш учун ЕИга аъзо бўлиб қолиш муҳимдир. ЕИдан чиқиш эса, инвестицияларни ва иш жойларини камайтиради, мамлакат иқтисоди учун янги хавфлар яратади.

“Ҳаракат”нинг фикрича, Буюбританиянинг ЕИдан чиқиши катта сиёсий хавфлар ҳам яратади. Бу мамлакатнинг ЕИдан чиқиш-чиқмаслик масаласи Сурия ва Ироқдаги кризисни ҳал этишдан ҳам муҳимроқдир. Тўғри, Буюбртания таркибидаги аҳолисининг маълум қисми мустақиллик орзуси билан яшайдиган Шотландия, Уэльс ва Шимолий Ирландия бу референдумдан ўзлари учун фойда чиқаришни ўйлаб, референдумнинг жаҳонда бўладиган акс садоси ҳақида ўйламаётган бўлишлари мумкин. Аммо буни уларга тушунтириш, уларнинг ўзи биринчи навбата кўп нарса йўқотишлари муқаррар эканлигини уларнинг мясига сингдириш лозим.

Умид қилиш керакки, Ғарбнинг сиёсатчилари шу йўналишда ҳам иш олиб борадилар.
« Олдинги хабар Хабарлар рўйхати Кейинги хабар »