03 February 2016
19:07 - Абдураҳим Пўлат АҚШ Президенти Барак Обамага: АҚШ ва бутун дунёда анти-исломий қарашлар фақат ортади

“Бирлик” Партияси лидери Абдураҳим Пўлат АҚШ Президенти Барак Обамага “АҚШ ва бутун дунёда анти-исломий қарашлар фақат ортади” деб ном берилган хат жўнатди. Қуйида шу хатнинг тўлиқ ўзбекча таржимаси.

* * * * *

1 февраль 2016 йил

Кимга: АҚШ Президенти жаноб Барак Обамага
Кимдан: “Бирлик” Халқ Ҳаракати Партияси (Ўзбекистон) раиси Абдураҳим Пўлатдан


 


   АҚШ ва БУТУН ДУНЁДА АНТИ-ИСЛОМИЙ ҚАРАШЛАР ОРТАДИ


 


 Ҳурматли жаноб Обама,

2015 йил 15 январда мен Сизга ислом терроризми муаммолари деб номланган мавзу бўйича хат ёзган эдим. Сиз тарафингиздан 2015 йил 23 апрелда имзоланган қисқа миннатдорчилик жавобини ҳам олганман.

Минг афсуски, ҳамма ҳам ислом терроризмининг илдизлари Қуръонни тўғри тушунмасликдан келиб чиққан Ислом динининг тушунчаларида эканлигини тушунмаяпти. Демак, Қуръоннинг янги тафсири яратилиб, Ислом дини дунёвийлик принципини қабул қилмагунча ислом терроризмини йўқ қилиб бўлмайди

Мен ўйлайманки, ислом терроризмини тинч йўллар билан йўқ қилиш учун Исломни ислоҳот қилиш, Ислом дунёвийлик принципини қабул қилишига эришиш мақсадида ҳаракат қилаётган жаҳондаги ягона кишиман. Бу осон иш эмас ва менинг овқат ейиш ва хат ёзиш каби ишларга вақтим ҳам йўқ. Бунинг устига, инглизчам ҳам яхши эмас. Шунинг учун, хатимда бўлиши мумкин бўлган хатолар ва қўполликлар учун кечирим сўрайман.

Мен Baltimore Sun газетасидан билдимки, Сиз Балтиморда бир масжидга ташриф буюрмоқчисиз. Табиий, бу ерда Ислом ва мусулмонлар ҳақида муҳим баёнотлар берасиз. Мен ўйлайманки, Сиз Ислом лидерларининг терроризмга қарши қуруқ гаплари етарсизлигини ҳам гапирасиз. Дунё Ислом лидерлари Исломнинг имиджини тузатишга қаратилган конкрет ишлар қилаётганини кўришни истайди. Исломда фундаментал ислоҳотлар қилиниши ва натижада Ислом дунёвийлик принципини тан олиши керак бўлади.

Мусулмонлар шуни тушуниши керакки, Исломда фундаментал ислоҳотлар ўтказилиб, жумладан, дунёвийлик принципи қабул қилинмагунча, Қўшма Штатларда ва ва бошқа демократик давлатларда Ислом учун дин эркинлиги йўқ ва бўлолмайди ҳам. Агар АҚШда дин эркинлиги бўлса, мусулмон эркаклар учун учта хотин олиш ҳуқуқи берилиши керак, мусулмонлар шариат қонунлари бўйича яшашлари керак. Бу қонунларга кўра, майда ўғриларнинг қўли кесилади, каттароқ жиноят қилганлар тошбўрон қилиб ўлдирилади. Ва албатта мусулмонларга АҚШни исломий давлатга айлантириш учун ҳаракатлар бошлаш ҳуқуқи берилиши керак.

Минг афсуски, кўпчилик давлат расмийлари, олимлар ва журналистлар бу масалаларни билишмайди ёки тушунишмайди. АҚШдаги исломий ташкилотлар эса, ҳаммани алдаш ва сотиб олиш билан машғуллар. The USA Today газетаси Фатхулла Гуленнинг исломий ташкилотлари конгрессменларнинг юрт ташқарисига қилган сафарларига қандай қилиб пул тўлаётганини ёзди. Мен бошқача мисолларни ҳам биламан.

Аммо, мен ишонаманки, Сиз Мэриленд штатидага масжидда мусулмонлар билан учрашар экан, Исломда чуқур ислоҳотлар ўтказилиб, дунёвийлик принципи тан олинмагунча АҚШ ва бутун дунёда анти-исломий қарашлар фақат ортиб бориш ҳақида мусулмонларни огоҳлантирасиз. Акс ҳолда, Сизнинг масжиддаги учрашувингиз мавжуд ислом террористларини ва, бундан ҳам муҳими, потенциал ислом террористларини рағбатлантирувчи сигнал бўлиб қолади.

Мен аминманки, жаноб Доналд Трамп ҳақли. У анчагина қўпол гапираётган бўлса ҳам, аслида, америкаликларнинг эътиборини 21-чи асрнинг асосий чақириғи бўлган ислом терроризмига тортмоқда. Америкаликлар уни эшитишди. Бу яхши нарса. Кейинги қадам бу муаммони ечиш йўлидаги ҳаракатлар бўлади.

Ҳурматлар билан,
Абдураҳим Пўлат

(Хатнинг охирида Абдураҳим Пўлат ўз адреси, телефон номери ва электрон адресини кўрсатган. Хатнинг инглизчаси билан сайтимизда танишиш мумкин - http://harakat.net/en/news/?id=193)

* * * * *

Абдураҳим Пўлат: АҚШ Президенти Мэриленд штатидаги бир масжидга ташриф бyюрмоқчи эканлиги, бу ташриф 3 февралга, яъни бугунга режалаштирилгани ҳақида 31 январда “Ҳаракат” сайтида ҳам хабар берилган бўлса ҳам, бу ҳақда жаноб Обамага хат ёзиш ҳаёлимга ҳам келмаган эди. Аммо, 1 февралда шундай фикрга келдим, лекин ростдан ҳам бунинг учун вақтим бўлмади. Ниҳоят 1 дан 2-чи февралга ўтар кечаси бу хатни ёздим. Бир саҳифалик хатни ёзиш 7-8 соат вақтимни олди. 2-чи февраль куни эрталаб хатни принт қилиб, дарҳол почтага бордим, аммо, энг тезкор почталар ҳам хатни 3 февралда Оқ Уйга етказа олишларини айтишди. Интернетда қарасам, Оқ Уйнинг одамлардан хат оладиган факси ҳам йўқ экан. Оқ Уйнинг электрон почтаси фақат ўта қисқа хатларни оларкан. Ўз хатимни бўлимларга бўлиб юбордим, аммо кўнглим тўлмади.

Шундан кейин ўзим Вашингтонга бориб Оқ Уйга хатни шахсан топширмоқчи бўлдим. Бундай қилиб бўлмаслигини билсам ҳам, вазиятни ўрганиш учун атайлаб у ерга бордим ва Оқ Уйнинг ёнидаги Оқ Уй маъмурияти ўтирадига машҳур Эйзунхауэр биносининг киришларидан бирининг олдига келиб, у ердаги қуролланган ва ҳарбий формада турган кишидан “жуда зарур бир хатни кимгадир тоширишнинг қандайдир йўли борми?” деб сўрадим. У дарҳол “йўқ” деди. Мен “Афсус, эртага жаноб Обама Мэриленддаги масжидга борар экан, унга огоҳлантириш маъносидаги муҳим хатим бор эди” дедим ва кетишга бошладим.

У ҳарбий менга “Яхши, кутинг, мен кимнидир чақиришга ҳаракат қиламан” деди. Тезда тахминан 30 ёшлардаги ва фуқаровий кийимдаги 2 киши олдимга чиқди.

Тезда тушундики, менинг “Обамани огоҳлантириш” деган сўзларим бутунлай бошқача тушунилган бўлиб, бу икки киши Оқ Уй хавфсизлик хизматчилари экан. Улар жуда назокат билан менинг кимлигимни ҳар томонлама сўраб-суриштириб билиб олишди, менинг “огоҳлантириш” сўзим сиёсий маънодаги эканлигини тушунишди ва Обамага хатимни ҳам бир қараб чиқиб, қабул қилинган тартибга кўра, ҳар қандай хат почта орқали жўнатилиши кераклигини айтишди. Мен уларга “ҳар қандай тартибни ҳам маълум ҳолатларда расмий йўллар билан айланиб ўтиш мумкинлиги ва кераклиги, бу хатимни уларнинг ўзи Оқ Уйнинг матбуот котибиятига олиб кириб беришлари мумкинлиги, АҚШдек давлатда бундай нарса йўқлигидан ҳайрон бўлганимни, аммо белгиланган тартибларни ҳурмат қилишим, демак, эътирозим йўқлигини” айтдим. Шу билан хайрлашдик, у ердан кетдим.

Ҳа, дарвоқе, ўйлайманки, Обама хатимни ўқиса ҳам, барибир бугун (ҳозир АҚШда эрталаб) у Мэриленддаги масжидда ислом террорчиларини феълан рағбатлантирадиган гаплар гапирарди. Кўрамиз, айнан шундай қилади ҳам. Бу нарса Ислом дунёсининг зарарига ишлайди. Янглишган бўлсам, хурсанд бўламан.