Reuters агентлиги БМТнинг Сурия бўйича махсус вакили Стаффан де Мистурaга асосланиб билдиришича, 29 январда Женевада Сурия масаласи бўйича анча вақтдан бери гапириб келинаётган музокаралар бошланади. Бу ҳақда умумий фикрга келиш учун АҚШ Давлат Котиби Жон Керри ва Россия ташқи ишлар вазири Сергей Лавров кўп марта телефон орқали гаплашдилар. Жон Керри бу масалани муҳокама қилиш учун махсус Европага келди, шахсий учрашувлар ўтказди, жумладан, Сергей Лавров билан ҳам.

Женевадаги музокараларда АҚШ, Россия ва яна бир қатор Европа мамлакатларининг ташқи ишлар вазирлари, Сурия ҳукумати ва унга мухолиф бўлган кучларнинг вакиллари қатнашишлари керак. Табиий, террористик деб топилган ИШИД кабиларнинг вакиллари у ерда бўлмайди. Аммо, қайси мухолиф гуруҳларни чақириш хусусида ҳам тўла келишув ҳалигача йўқ. Масалан, Туркия қарши бўлгани учун Сурияда Башар Асад режимига қарши қуролли кураш олиб бораётган курдларининг вакиллари чақирилмайдиган бўлди. Аммо, Россия бу ҳақда ҳали аниқ фикрга келинмаганини айтмоқда. Сўнги дақиқаларда эса, Башар Асад режимига қарши курашаётган Сурия Мухолифат Кенгаши Женевага боришдан бош тортганини билдирди.

Женевадаги музокаралар Суриянинг келажагини белгилашда катта роль ўйнайдиган тадбир сифатида уюштирилаётган эди. Аммо, бундай бўлмаслиги, Суриядаги конфликтни музокаралар йўли билан ҳал қилиб бўлмаслиги аввалдан маълум, дейди мухбиримиз. Чунки, Сурия муаммосининг ечими – Ғарб ва Россиянинг бу хусусдаги келишувидир. Аммо, Россия ва ҳозир унинг асосий ҳамкорига айланган Эроннинг мақсади Сурияда шиаларга яқин оқимларнинг ҳокимиятини сақлаб қолиш, Ғарбнинг, биринчи навбатда, АҚШнинг мақсади бу режимни йиқитиш.

Демак, жуда катта эҳтимоллик билан тахмин қилиш мумкинки, Женевадаги йиғилиш натижасиз битади. Сурия муаммоси фақат ва фақат қурол кучи билан ҳал этилади, Башар Асад режими Ғарб тарафидан куч билан йиқитилади. Воқеалар қачон битишини ҳозирча тахмин ҳам қилиб бўлмайди.