31 December 2015
06:17 - Нефтнинг нархи тушишда давом этмоқда ва давом этади
Дунёда нефтнинг нархи кенг маънодаги тушунчадир, чунки, ҳар қандай хом ашё каби нефтнинг нархи унинг сортига қараб белгиланади. Жаҳонда нима кўп, нефть заҳиралари кўп, турли заҳиралардан олинадиган нефтнинг сорти турли, демак, уларнинг нархи ҳам турли бўлиши керак. Аммо, ҳозир дунёда нефтнинг нархи иккита сортга боғланган, булар – Шимолий Америка ёки West Texas Intermediate (WTI) нефти ва Шимолий Денгиз (Brent) нефти. Биринчи сорт АҚШ биржасида, иккинчи нефть Лондон биржасида сотилади.

Бу икки сорт нефтнинг нархи бир-биридан фарқ қилади. Аммо, тушган сари улар бир-бирларига яқинлашиб бормоқдалар. Масалан, кеча нефть биржаларида истеъмолчиларга февраль ойида етказиб бериладиган WTI нефтнинг 1 барели (42 галлон ≈ 159 литр) $36,51 дан сотилган бўлса, Brent нефти $36,39 дан сотилди.

Нефтнинг нархи ўтган асрнинг 80-чи йилларида 20 доллар атрофида бўлиб, кейин кўтарилиб борган ва 2008 йилда 143 долларга чиққан, аммо ўша йили аввал АҚШда, кейин бутун дунёда бошланган молиявий-иқтисодий кризис пайтида нарх 40 долларгача тушди, кейин яна юксалиб 100 доллар атрофида ўйнаб турди.

Украинадаги воқеалардан кейин Ғарбнинг Россияга қарши киритган санкциялар билан жаҳонда нефть нархининг кескин тушишга бошлаши бир вақтга тўғри келди ва Россиянинг бошига бало бўлди.

Нефть нархининг ортиши ҳам, тушиши ҳам зиг-загли бўлади. Ҳатто шу кунларда ҳам нефтнинг нархи бир неча кун бироз ортган ва яна тушган кунлар бўлди. Аммо, умумий тенденция – тушишдир. Нархнинг келажаги ҳақида экспертларнинг фикрида якдиллик йўқ. Бунинг сабаби – экспертлар ҳам сиёсий ўйинларга қўшилганликлари бўлиши мумкин. Лекин, кўпчилик нефтнинг нархи 20 долларгача тушиши ҳақида гапирмоқда.

Расмда - Brent нефти нархининг 1988 йилда бугунгача ўзгаришини кўрсатувчи график.
« Олдинги хабар Хабарлар рўйхати Кейинги хабар »