24 November 2015
21:29 - Пенсияга чиқишнинг минимал стажи ўзгартирилади
Ўзбекистон Олий Мажлиси Қонунчилик палатаси депутатлари пенсияга чиқиш учун минимал стажни 5 йилдан 10 йилга узайтириш таклифи билан чиқишган. Бу ҳақдаги қонун лойиҳасини муҳокамага чиқарган депутатларга пенсия билан боғлиқ харажатларни камайтириш борасида ҳукуматдан топшириқ бўлганига шубҳа йўқ. Чунки президент Ислом Карим бир неча йиллардан бери пенсия ва ижтимоий тўловларни қисқартириш ҳақида гапириб келади.

Ташаббускор депутатлар бу “фуқароларнинг ўз пенсион ҳуқуқларини шакллантиришдан манфаатдорлигини оширишга, республикада пенсиянинг ўртача даражасини кўтаришга, шунингдек, меҳнат стажини пенсия ҳажми билан боғлашга имкон беради” деган кулгили иддао билан чиқишмоқда. Маълум бўлишича, жараён уч босқичда амалга оширилади: 2016 йилдан минимал талаб 7 йилга, 2017 йилдан 9 йилга ва 2018 йилдан 10 йилга етказилади.

Депутатларнинг таъкидлашича, бу таклиф халқаро тажриба ҳолатларидан келиб чиқади. Халқаро меҳнат ташкилоти конвенциясига биноан ёш пенсияси учун талаб қилинадиган минимал стаж 15 йил қилиб ўрнатилган. Кўпгина давлатларда, шу жумладан, МДҲда ҳам бу кўрсаткич айни пайтда 10-15 йилни ташкил қилмоқда. Аммо шуни ҳам таъкидлаш керакки, Ўзбекистонда инсонларнинг ўртача умр кўриш ёши бирмунча пастдир.
« Олдинги хабар Хабарлар рўйхати Кейинги хабар »