10 November 2015
07:49 - Бечора Путин: Россияниннг Адлия вазирлиги Ҳуқуқ ҳимоячиси "Мемориал" марказини конститутцион тузумга путир етказишда айблади

Дунёга машҳур ташкилотга бундай ҳужум бошлаш учун Адлия вазирлиги Россия президентидан рухсат олгани шубҳасиз. Бечора Путин эса шунақа ишлар билан шуғулланишга мажбур, чунки у ўзининг ва Россиянинг обрўси кун сайин тушиб бораётганини оқлаш учун бунинг айбдорларини топиши керак. Мана шундай айбдорлардан бири "Мемориал" бўлади.

Адлия вазирлигининг иддаосига кўра, "Мемориал"нинг ҳуқуқ ҳимоячилари Россиянинг олий органлари тарафидан олиб борилаётган давлат сиёсати хусусида жамиятда салбий фикр шакллантириш учун сиёсий фаолият олиб бораётган эмишлар. Вазирликниннг экспертлари ўз иддаоларини иботлаш учун "Мемориал"нинг сайтида айтилган иккита фикрни мисол сифатида келтиришибди.

Биринчиси. "Мемориал"нинг сайтида Россиянинг Украинага қарши ҳаракатлари "агрессия тарифига тўғри келаётгани" айтилган.

Иккинчиси. "Мемориал"нинг сайтида Путиннинг учинчи марта ноқонуний равишда президент қилиб сайланишига қарши уюштирилган митинг қатнашчиларининг жазоланиши қораланган.

Экспертлар бундай фикрларни билдириш конститутцион тузумга путир етказишдан ташқари, мавжуд ҳокимиятни йиқитиш учун чақириқдир, дейишибди.

Эслатиб ўтиш керакки, Россияда яқинда қабул қилинган янги қонунларга кўра, чет эллардан олинган грант олиб ишлаётган ташкилотларга мажбуран "чет эл агенти" мақоми берилади. "Мемориал"га бундай мақом бериб бўлинган. Навбатдаги мақсад - бу ташкилотни бутунлай ёпиб ташлаш бўлса керак.

Эслатиб ўтиш керакки, "Мемориал" норасмий ташкилот сифатида 1987 йили тузилган, 1989 йили расман таъсис қурултойини ўтказган, ва айнан унинг асосида 1991 йили "Ҳуқуқ ҳимоячиси "Мемориал" маркази" яратилган.

"Бирлик" лидери Абдураҳим Пўлат ўз хотираларида шундай дейди: 1992 йилнинг охирида Ўзбекистон Инсон Ҳуқуқлари Ташкилотининг раиси бўлган укам Абдуманноб Бишкекдан ўғирлаб келиниб, Тошкентда қамоққа ташлангандан кейин, мен ҳам қамалсам онам бунга чидай олмасликларини билганим сабабли, Москвага кетдим. "Мемориал" бизга хона ва бир компютер берди. Шу ерда Баҳром Ҳамроев, Альберт Мусин ва ҳозирда марҳум Абдурашид билан "Марказий Осиё ҳуқуқ ҳимоячиларига ёрдам бериш" ташкилоти туздик.

Мен аввал Озорбайжонга, кейин Туркияга кетдим, бу ташкилотга Тошкентдан келган ҳозирда марҳум бирликчи Муҳаммадамин Нарзиқулов раҳбарлик қилди ва тузган ташкилотимиз ўша пайтларнинг нуқтаи назаридан жуда катта ишлар қилди.

Яъни, "Мемориал" ўзбеклар учун ҳам муҳим ташкилотдир. Ўзбекистонлик ҳуқуқ ҳимоячилари ва умуман ҳамма ўзбек демократлари "Мемориал"нинг ҳимоясига ташланишлари керак.