30 августдан бери ҳар куни Сурияда ИШИД базаларини ҳаводан бомбалаётган Россия расмийлари ИШИД жангарилари таҳликага тушгани, жангариларнинг кичикроқ бир қисми Европага қочаётган бўлса, 500-600 киши Суриянинг расмий армиясига таслим бўлганини гапирмоқдалар. Россия қуролли кучларининг Бош штаби қўмондони Андрей Картополов ҳаво ҳужумлари яна ҳам кўпайтирилишини айтмоқда. Ғарб эса, Россия ИШИДдан ҳам кўпроқ Башар Асадга мухолифатда бўлган бошқа қуролли кучларни бомбалаётганини урғуламоқда.

Россия Сурияда нималарга эришолиши ҳали номаълум. Путин учун ҳозир Ғарбга тишини кўрсатиб қўйиш муҳимдек кўринмоқда.

Хўш, Путиннинг Донбасдаги режалари қанақа? Маълумки, 2 октябрда “Нормандия тўртлиги” деб номланган Украина-Россия-Франция-Германия раҳбарларининг йиғилиши бўлиб ўтди. Бу ерда Путин ўзини бироз орқага чекингандек тутди. Украина, Франция ва Германия раҳбарлари Петр Порошенко, Франсуа Олланд ва Ангела Маркел Донецк ва Луганскда маҳаллий сайловлар Украина қонунлари асосида ўтказилишини талаб қилишгач, Владимир Путин Донецк ва Луганск раҳбарлари билан бу масалани гаплашиш учун ўз одамларини юборишга ваъда берибди. Маълумки ўзини халқ республикалари деб номлаётган Донецк ва Луганск мустақил давлатдек сайловлар ўтказиш ниятида сайлок кунини ҳам белгилаб бўлганлар.

Аммо, Путиндан ҳозир орқага чекинишини, Луганск ва Донецкда сайловларнинг тўхтатишини кутиб бўлмайди. Унинг мақсади, ҳаммани алдаб юриб, Россиянинг Ғарб санкциялари остида ботаётган иқтисодини қутқариб қолишдир.

Нима ҳам дердик, бечора Путин деймиз. У Россия Федерациясини ҳалокатга олиб кетмоқда, холос.