АҚШ Президенти Барак Обама БМТнинг Бош Ассамблеяcида ҳозиргина нутқ сўзлаб, дипломатик тил билан ҳамма нарсани очиқча гапирди. Мана унинг баъзибир фикрлари.

У дедики, биз Россияни кучсизлантиришни истамаймиз, Россия кучли ҳамкоримиз бўлишини истаймиз, аммо Украинадаги воқеалардан кейин Россияга қарши киритилган санкцияларни бекор қилмаймиз. Обаманинг сўзларини оддий тилга айлантирсак, АҚШ раҳбарлигидаги Ғарб тарафидан киритилган санкциялар воситасида бугунги Россия Федерациясини тиз чўктриш ҳаракатлари давом этади.

Обама Сурия президенти Башар Асадни тиран деди, аммо Суриядаги муаммоларини ечиш учун Россия ва Эрон билан ишлашга тайёр эканлигини айтди. Яъни, Суриядаги кризисдан чиқиш ва ИШИДни йўқ қилишда Россия ва Эроннинг ҳарбий кучидан фойдаланиш керак, аммо ИШИДдан кейин навбат Эрон ва Россияга келади.

АҚШ Президенти камтаринлик қилиб, АҚШ дунёнинг ҳамма муаммоларини бир ўзи ечишга қодир эмаслигини айтди, аммо, дипломатия етрсиз бўлса, куч ишлатишга тайёр эканлигини айтишдан тортинмади.

Барак Обама мигрантлар масаласини ҳам тилга олиб, АҚШнинг ўзи мигрантлар мамлакати эканлигини урғулар экан, қочқинларга ёрдам беришга қаратилган янги дастурлар ишга тушишини урғулади.

Табиий, у бир йилдан кейин бўладиган президент сайловларида президент бўлиши эҳтимоллиги ортиб бораётган Доналд Трампнинг позицияси мутлақо бошқача эканлигини тилга олмади. Бироқ, бутун дунё энди Обамага эмас, Трампга қулоқ солаётгани ҳаммага маълум.

Хуллас, Барак Обама БМТда АҚШ Президенти сифатидаги сўнги нутқини қилди. Обама ҳам, унинг нутқи ҳам, тарихда қолади. Аммо, жаҳон лидерларининг диққат марказида энди Барк Обама эмас, Доналд Трамп туради.