Шу йилнинг 19 сентябрь куни Ҳуқуқ химоячиларининг Альянси раҳбари Елена Урлаева Тошкент вилояти Қуйи Чирчиқ тумани ИИБ томонидан балиқ овловчи қармоқ ўғирлаганлик каби абсурд билан айбланиб, ҳибсга олинди. Шубҳасиз, ҳукумат Урлаевани қамоққа олишгача бордими, унга жазо тайинлаши муқаррар. Аслида Урлаева Ўзбекистон ҳукуматининг томоғига қадалган суяк, мажбурий меҳнатни давом эттираётган расмийларнинг жиғига тегаётган кам сонли фуқаролик жамияти вакилларининг бири эди.

Маълумотларга кўра, Тошкент вилоятининг Қуйи Чирчиқ туманида истиқомат қилувчи фуқаро Шерзод Қамчибеков ҳукқуқ фаолини балиқ овига таклиф қилган, дам олиш куни муносабати билан эри ҳамроҳлигида Қуйи Чирчиққа борган ҳуқуқ фаолига провакация тайёрланганди. Буни баралла, ошкора айтамиз: Урлаева қармоқ ўғирлаш, майда-чуйда жиноят ёки қонунбузарликлар содир этиш даражасидаги одамлардан юксакда эди.

Ўзбекистон ҳукумати ўз вақтида жафокаш бу аёлни бир неча марта руҳий хасталиклар шифохонасига тиқди, миршаблар уни калтаклаб, азоб беришди. Аммо бу аёл ахдидан, принципларидан қайтмади. Ҳалоллик, беғуборликнинг тимсолига айланиб борди. Унинг хизматлари халқаро ташкилотлар, жаҳон ҳамжамияти томонидан эътироф этилганди.

Ўзбекистон инсон ҳуқуқлари “Эзгулик” жамияти раиси Васила Иноятова эртага, 21 сентябрда Варшавада бошланадиган ЕХҲТнинг инсон ҳуқуқлари бўйича анъанавий саммитида Елена Урлаева масаласини кўтаради. Токи, Ўзбекистон ҳукумати расмийлари ана шу саммитда бошини кўтариб ўтириши учун Елена Урлаева шартларсиз озод қилиниши керак. Аксинча, фуқаролик жамияти вакилларининг намоёндаларидан бири ана шундай муътабар йиғин олдидан ҳибсга олинган экан, мамлакатдаги инсон ҳуқуқлари масаласи буйича гап ҳам бўлиши мумкин эмас.

"Ҳаракат": Техник сабаблар билан "Эзгулик" жамиятининг 20 сентябрда эълон қилинган пресс-релизи бизга кечроқ етиб келди.