25 August 2015
07:52 - “Нормандия тўртлиги”нинг уч лидери Берлинда Путинсиз учрашди

Расман Украинанинг Донбасс қисмидаги урушни, аммо, феълан Украина-Россия конфликтини тинч йўлар билан ечиш ниятида қурилган “Нормандия тўртлиги”га Франция, Германия, Россия ва Украина киради. Бу тўртликнинг сўнги саммити шу йил 14 февралда Минскда ўтказилган эди. Ўша саммитидан кейин Донбассда оғир қуроллар иштирокидаги шиддатли жанглар тўхтаган бўлса ҳам, “бугун у ерда, эртага бу ерда” қабилида отишмалар тўхтовсиз давом этмоқда. Яъни, конфликт бироз музлатилди, аммо битгани йўқ. Очиғини айтса битмайди ҳам, дейди мухбиримиз.

Аммо, кеча Берлинда Франция, Германия ва Украина раҳбарлари “Нормандия тўртлиги” форматидан чекиниб, ўзаро йиғилиш ўтказганлари Путин тарафидан қандай баҳоланиши номаълум. Бир нарса аниқ, тўртлик ичидаги ишончсизлик даражаси яна ортади, холос.

Ҳозир кун тартибининг асосий масаласи, кузда Украинада бўладиган маҳаллий сайловлар. Маълумки, феълан Россиянинг қўли остида бўлган Луганск ва Донецкнинг катта қисмида Украина қонунлари бўйича сайлов ўтказиш ҳақида гап ҳам бўлиши мумкин эмас. Сепаратистлар Луганск Халқ Республикаси ва Донецк Халқ Республикасининг сайловларини ўз қонунлари бўйича ўтказмоқчилар. Киев у сайлов натижаларини тан олмоқчи эмас. Украина ўз Конституциясига ўзгартиришлар киритиб, маҳаллий ҳокимиятларнинг ваколатларини оширди, аммо Донецк ва Луганск мухторият истамоқда. Демак, уруш давом этаверади. Тахмин қилиш мумкинки, Берлинда шунга келишдилар.