24 July 2015
01:08 - Таниқли кинорежиссёр Алишер Ҳамдамов оламдан ўтди, у миллат учун нима қилганди?
Тошкентда таниқли кинорежиссёр деб аталаётган Алишер Ҳамдамов 22 июль куни 72 ёшида оламдан ўтди. Ижодкор ўша куниёқ пойтахтдаги ўз уйидан чиқарилди ва тупроққа берилди.

У мультипликацияда режиссёр ва сценарийнавис сифатида, шунингдек, Ўзбекистон ҳужжатли фильмлар студиясида ишлаган. “Наштар” киножурнали учун сатирик сюжетлар тасвирга олган. Кўплаб тўла метражли бадиий фильмлар ва сериаллар муаллифи эди.

У 1988 йили Худойберди Тўхтабоевнинг “Қасоскорнинг олтин боши” романи асосида ўтган асрнинг бошларида Самарқандда Россия империяси маъмуриятига қарши курашган “ўзбек Робин Гуди” – Намоз Пиримқуловнинг саргузаштларига бағишлаб фильм олгани ҳам айтилмоқда. 1988 йил - ўзбекнинг тарихида биринчи миллий-озодлик ҳаракати шаклланишга бошланган пайт эди. Аммо, ўшанда “Қасоскорнинг олтин боши” фильмига қандайдир эътибор бўлгани ҳақида маълумот йўқ.

Алишер Ҳамдамов миллий масалалар билан қизиқса, нима учун “Бирлик” ҳақида ёки бирликчи, ўзбекдан чиққан Робин Гуд каби биринчи ҳақиқий қаҳрамон, 2001 йили Ислом Карим режими тарафидан осиб ўлдирилган Шовруқ Рўзимуродов ҳақида фильм тайёрламади, деган саволларга жавоб қидирсак, бу “таниқли” кинорежиссер миллат билан иши бўлмаган одам эканлигини тушунамиз. Минг афсуски, ҳозир Ўзбекистон бундай одамлар, бундай санъаткорлар билан тўла. Мана энди уларнинг сони биттага камайибди.