17 July 2015
19:51 - Ўзбекча ҳайитолди масхарабозча хабарлар: Ярим йилда Ўзбекистонда ЯИМ 8 фоизга ортган, GM-Uzbekistan эса автомобиллар ишлаб чиқаришни 6,5 фоизга камайтирган
Ўзбекистондаги режимнинг қўғирчоқ ахборот воситалари бугун “Ўзавтосаноат” акционерлик компаниясига асосланиб, аммо ҳеч қандай таҳлилсиз, тарақатган хабарларида айтилишича, бу йилнинг биринчи ярмида GM-Uzbekistan 119 минг 412 автомобиль ишлаб чиқарибди. Ўтган йилнинг шу даврида бу рақам 127 минг 700 бўлган экан. Яъни, автомобиллар ишлаб чиқариш 6,5% камайган.

Қўғирчоқ ўзбек журналистлари қилмаган таҳлилни биз қилайлик, дейди мухбиримиз. Аввалари ҳам кўп марта такрорлаганимиздек, 2008 йилда АҚШда бошланган молиявий-иқтисодий кризис аввал ривожланган мамлакатларни урди, кейин ўрта ривожланган мамлакатларга етиб келди, ҳозир Ўзбекистонга ўхшаган ривожланмаган, қашшоқ мамлакатларга етиб келмоқда.

Америкаликларнинг замонавий технологиялари билан ишлайдиган GM-Uzbekistan корхонаси ишлаб чиқаришни 6,5% камайтиргани - кризис Ўзбекистонга етиб келганининг исботидир.

Ваҳолангки, бир неча кун аввал Вазирлар Маҳкамасининг мажлисида Ўзбекистоннинг Ялпи Ички Маҳсулоти бу йилнинг биринчи ярим йилида 8,1 фоизга ошгани айтилганди. Табиий, бу рақам Ўзбекистон президенти ва ҳукумати тарафидан айтиладиган ёлғонлардан биридир. Тахмин қилиш мумкинки, Ялпи Ички Маҳсулотнинг ортиши ҳам бу йилнинг 6 ойи ичида 6,5 фоизга ёки тахминан шунчага зарар кўрган. Яъни, кутилаётгандек, Ўзбекистонга иқтисодий кризис етиб келди.
« Олдинги хабар Хабарлар рўйхати Кейинги хабар »